He pātītī anō te kai mā Aotearoa i a karapu whutupōro o Airangi, i a Munster, ka haukerekere i te kapa Ōpango Māori i te ata nei ki Limerick, mā ngā piro tekau ma toru. Anei ngā whakanekeneke.
He mihi ki te rangatira o Munster, a Anthony Foley kua riro.
He whawhai ururoa i ngā mēneti tekau tuatahi. Nā wai rā ka hapa tuatahi te Kapa Māori kia whai wā a Munster ki te whakawhiti i te rarangi.
Nā te whatukura a James Lowe i hoki mai mō te kapa i ngā mēneti rua tekau ma whā, ā ka eke panuku tonu te kapa i te waewae a Otere Black.
I piata mai ko ngā pūkenga hoatu, nā wai nā wai kua puta te ihu o te tauhou a Ambrose Curtis ki te whai i tōna piro tuatahi. He whana māmā anō mā Black hei kīnaki.
Ka whakawhāiti a Munster i ngā tatau i tēnei piro whiu, heoi nā ngā hapa ki ngā Māori a Darren Swetnam i hoki kaha mai ma Munster i mua i te wehenga rua. Tekau ma whitu ki te tekau ma whā ki a Munster.
Heoi he piro whiu anō ki ngā Māori e toru mēneti ki roto i te wehenga rua. Ka whai wāhi anō ki te hoki mai heoi auare ake, ā ka hiki anō ngā pūkenga karo a Munster kia kore ngā Māori mō te wāwahi.
Ā, nā Roran O'Mahony te kōrero whakamutunga mo Munster. Tekau mēneti e toi ana, ā mārakerake te kitea atu e kore ngā Māori mō te ora anō, heoi he karo noa iho i te hoa riri kia kore e whai piro anō. Rua tekau ma whitu ki te tekau ma wha ki a Munster.
Hei tēnei Rāpare tuki atu ai ngā Māori ki te karapu o Harlequin ki Rānana.
