E rua rā te roa o te wānanga kei Waahi Pā, mō ngā kaiako o ngā kōhanga reo o Te Riu o Waikato, hei whakamōhio i a rātou ki ngā āhuatanga o te Kīngitanga me te hanga rauemi anō hoki.
Heoi ehara i te mea ka pupuritia ngā hua o te wānanga nei hei painga mō ngā kōhanga reo o Waikato anake, engari ko te hiahia a ngā kaiwhakahaere o Te Kāhui Rangatahi, kia whakarewahia ki ngā kōhanga reo o te motu a tōna wā.
Nā runga i te karanga a Te Kāhui Rangatahi, kua whakakao mai ngā kaiako o ngā kōhanga reo o te rohe ki te whakapakari i a rātou anō i mua o te hokinga atu ki te whakarewa i te mātauranga.
E ai ki a Erana Kihi o Te Kāhui Rangatahi, “Kia whai wāhi ai rātou ki te āta wānanga i ngā kōrero mō te Kīngitanga me te whāngai i aua kōrero ki ngā tamariki mokopuna.”
Hei tā tētahi kaihāpai mō te Kīngitanga, a Huirama Matatahi, “Ko te pūtakenga mai o te Poukai, ko te pūtakenga mai o te karakia te Pai Marire, otirā ko ngā āhuatanga i runga i tēnā Kīngi, i tēnā Kīngi o te rārangi Kīngi, otirā ko ētahi atu o ngā kōrero ko ngā tongi a Tāwhiao, ōna kōrero i ngā wa o mua, e haere tonu ana i ēnei rā.”
He momo wānanga e hiahiatia ana e te katoa o ēnei kaiako, ahakoa ko te nuinga nō konei tonu, ehara i te mea kei i a rātou ngā mōhiotanga katoa mō te Kīngitanga, me ōna nei tikanga, ōna nei whakahaere.
E ai ki tētahi kaiako, a Maraea Te Wara, “Kia whai mātauranga mō te Kīngitanga, kia mōhio ake ahau ki ngā hītori, ngā whakatakotoranga mō te Kīngitanga katoa, kia āhei au ki te whāngai ki aku tamariki, ōku tamariki i roto i te kōhanga reo, ōku tamariki hoki.”
He tīmatanga tēnei mā ngā kaiako o ngā kōhanga reo o Waikato-Tainui hei arataki i te kaupapa mō tēnei wā, i runga i te whakapono he whāinga nui ake kei mua i te aroaro.
Ki tā Kihi, “Koina te whāinga nui kia tae ai mātou ki te taumata e taea ai e mātou te whāngai i wēnei kōrero ki ngā iwi katoa e hiahiatia ana, kia māmā hoki tā mātou whakarite rauemi hei toha ki ngā kura, ki ngā kōhanga reo a tōna wā.”
Ko te Kura Kaapuia te īngoa o te wānanga, ā ko te Kāhui Rangatahi e whakatinana nei i ngā kupu a Kīngi Tāwhiao, "ki te kotahi te kākaho ka whati, ki te kāpuia, e kore e whati."
