New Tūhoronuku chair appointed amidst Waitangi Tribunal recommendations for Ngāpuhi settlement

E whakahau ana Te Taraipiunara o Waitangi, me whānui ake ngā whakawhitinga kōrero ki ngā hapū o Ngāpuhi mo te mana whiriwhiri i te tono raupatu a te iwi. He kōrero e puta ngātahi ana me te whakataunga mō te heamana hōu o Tūhoronuku.

Ka whakatahaina a Sonny Tau i a ia anō kia wātea i te pōtitanga mō te heamana hou o Tūhoronuku, ka ara mai a Hone Sadlier.

Hei tā Sonny Tau, “I mea atu kia rātou i te mea e awhio atu ana i ngā matia muramura ki runga ki raro ki waenganui i au ka whakaaro au, ko te kaupapa nui kē ko ngā whakatatunga o ngā kereme o Ngāpuhi ehara ko hau te tino takenui.  Koia au i mea me kukume taku īngoa ki waho.”

Ki tā Hone Sadlier, “E mea ana au, e kore nei tēnei pahi e tu!  Ka haere tonu i te mea he itiiti noa kē ngā mea e hiahia tia ana kia whakaritengia e taea.”

He ra tēnei i puta mai te pūrongo a taraipiunara o Waitangi me tana tūtohu nui ki te karauna kia taihoa ngā whiringa me Tuhoronuku mō te whakatatutanga o Ngāpuhi kia tika rā anō ngā hapa e raru nei ngā hapū kaikereme.

E ai ki a Pita Tipene, “Ko taua kōrero rā anō mā ngā hapū anō ngā hapū e korero, engari kua roa kē te kāwana e whakakoretake ana i ngā hapū.  Kua tae te wā me tino kōrero ngā hapū kia Tūhoronuku me whakarongo hoki te kāwanatanga te minita a Chris Findlayson.  Ina kore kua raruraru tonu a Ngāpuhi.”

I roto i tōna whakahau kia tirohia ohoreretia tēnei take ka mea a Kaiwhakawaa Reeves kua kitea e ia ngā whakaaturanga o ēnei whakahaere a te Karauna he mahi whakatoiharae kore amuri e hokia.  Nā, i tēnei rā kua whakatuturutia aua kitenga ahatia te kore whakaae mai a te heamana o mua o Tūhoronuku.

Ki tā Tau, “E hanga pōhēhē kē ana ētahi o ngā mea kei roto i te ripoata engari i te mutunga me tirohia.  Horekau anō kia tirohia hohonutia kia kite ai mehemea ka tāea ai te whakatikatika i ngā mea katoa.”

He take whakahirahira tēnei hei wānangatanga mā ngā hapū o Ngāpuhi a ngā rā ki tua.