Me waiho kia tau tonu te kaipuke Rena ki tōna takotoranga. Koia te kī a Te Kāhui o ngā Pākeke o Te Patuwai o Motiti ki te pae whakawā i te tono a MV RENA. Engari he karanga tēnei e tuki ana ki tā ētahi atu rōpū e kī ana, me tango atu.
E whakapono ana te māngai o Te Patuwai ki Motiti, a Nepia Ranapia, me waiho te kaipuke Rena ki te toka o Otaiti.
Hei tā Nepia Ranapia o Ngā Pākeke o Te Patuwai, "Ko te aro o mātou kei whara he tangata, kua timata hoki te whara o te tangata i reira i te mea he hōhonu rawa."
Nā Nepia ētahi kōrero i whakatakoto ki te ropu whakawā i te tono whakaae a ngā rangatira, rōpu inihua hoki o te kaipuke Rena, kia waiho te kaipuke ki te toka. Hei tāna, ki te nekehia te kaipuke, ka tūkinohia a rātou pātaka kai.
"Wa tātau kāinga mahi kai, wērā mea he tapu ki a tāua te Māori, engari me āta titiro tātau me pēhea ngā mahi i reira," te kii a Ranapia.
I tīmata te whakawātanga, e ono wiki te roa, mō te tono whakaaetanga i tērā wiki. He kotahi rau, e rima tekau mā toru te nui o ngā tāpaetanga kōrero i tukua ki a Toi Moana. Ko tā Te Patuwai, he āwangawanga mō te oranga o te tangata.
"Ka mate he tangata i reira ka hē," te kōrero a Ranapia.
Ka haere tonu te whakawātanga a te Rā Hina e tū mai nei. Ka tū a Ngāti Awa ki te whakatakoto kōrero, ko te matapae, ka whakahē hoki i te nekehanga o te kaipuke Rena.
