Hei te mutunga o te tau Super Rugby ka porotau ngā karapu i ētahi o ō rātou whetu. Kāore ētahi, pēnei i ā Charlie Ngatai i te pīrangi kia pērā hei te wiki nei.
Hei tā Colin Cooper, kaiako o te kapa Chiefs, kāore tāna kapa e pīrangi ana kia tere poroakitia ō rātou toki whakaihuwaka. Hei tāna, ko tētahi ō ngā whāinga o ngā wiki e ono kua pāhure ko te whai wāhi ki ngā whiringa whānui. Kua tutuki tērā, ko te aronga ināinei, kia eke ki te whiringa whāiti.
Ko te Ōpango ō mua, ko Charlie Ngatai tētahi o aua kaitākaro, ka tūhono ia ki te karapū o Lyon i Wīwī hei te otinga o te whakataetae Super Rugby nei. Koia anō hoki tētahi e aro pū ana ki ngā mahi i Aotearoa, arā te eke anō ki te pae o angitu. Hei tāna, ko te whāinga ō ngā kaitakaro e wehe nei, pēnei i a Liam Messam, ko te whakanui i te katoa o te kapa mō ngā mahi kua tutuki i roto i ngā marama.
I kitea tuatahitia a Ngatai mō Tūranganui-a-Kiwa in the tau 2008, kātahi ka hūnuku ki ngā Raiona o Te Whanganui-a-Tara. I eke ia ki te taumata angitu mā te kapa Chiefs i te tau 2013, whai muri i tōna hūnuku mai i ngā Hurricanes.
Hei tā te uri o Ngāti Porou, o Te Whānau-a-Apanui anō hoki, he wā tōna ka hoki anō pea ki te wā kāinga, ki te Tai Rāwhiti. Kei te āhua o tōna tīnana ka hoki ia hei kaitakaro, hei kaiako rānei.
Ki te ora a Ngatai i te māuiui i whakatahangia e ia i te kēmu i tērā wiki, ka whakaingoatia anōtia ia ki te aroākapa ka tuki anō ki tāna kapa ō mua, ki ngā Hurricanes i te Whanganui-a-Tara hei te Pōmere nei.
