E kapi tonu ana ngā rori o te Taitokerau i ngā waipuke. Nā whai anō i kapi hoki ngā ahurei puta noa i te taitokerau nā te ua te take. Ahakoa tēra, kīhai ngā hau o Tawhirimātea mō te tītere i te iwi o Ngāti Hine i a rātou e whakanui ana i tō rātou ahurei nui.
Ko te kamupūtū me te amarara nga taonga i kitea ki te hui Ahuareka o Ngāti Hine.
Hei tā Des Tipene - Ngāti Mahanga, “Waipuke katoa ngā rori o Matawaia, kaare puta au."
Haukerekere hoki o te huarere, te kaha pupuhi hoki o te hau, he maaku hoki o konei ne.
Engari ehara i te kaupapa kata ki etahi atu. I mate ngā kaiahuwhenua te rāhui i o rātou kararehe ki whenua teitei ake.
I raru hoki ngā waka ki ngā huarahi, ā ko te ngākau kohuki tēra i ranonga e ngā mātua.
Ko tā Wiremu Keretene - Ngāti Hine, “He taumaha ki te haria mai ngā tamariki, i roto i tēnei āhua, ara te ua. Engari ko te mea nui kua tae mai mātou ki te tautoko i tēnei kaupapa.”
Pakaru mai ana a rautupu, ā he tata ki te rima tekau miramita i te haora te nui o te ua i ngahoro mai inapō. Ahakoa te waipuke kāore a Ngāti Hine mō te kapi i tana hui.
Hei tā Pita Tipene - Kaiwhakahāere Ahuareka, “Kua puta mai ngā hihi o Tamanuitera, kopatapata ana i ētahi wā, engari kua tae mai ngā tāngata, kutukutu pai ana tēnei marae. Na reira he mahana ana ngā nakau o ngā iwi, ahakoa e maaku ana te whenua."
Hei tā Waka Kotahi kua aukatia ētahi huarahi matua na te ngahoro o ngā paritahataha. Ahakoa ngā pēhitanga o te wā, hei tā Pita Tipene he painga tonu ka puta i te waipuke.
Ko tā Pita Tipene - Kaiwhakahāere Ahuareka, “Heke mai te ua nui, kua puta mai ngā tuna whakaheke, ana pēnā i tēnei rā, ka puta mai ngā tuna whakaheke ka harihari te iwi."
He ua anō ka kitea hei āpōpō, engari mō Ngāti Hine, ahakoa te aha ka ū tonu rātou ki te kaupapa kia kite ai i ngā pumanawa o te iwi.
