Operation Eight - Te pūrongo a te Mana Whanonga Pirihimana

Kua whakakite ake tētahi pūrongo a te Mana Whanonga Pirihimana, i hē, i poka ture hoki ngā mahi a ngā Pirihimana i te hōparatanga o Operation 8.

Ko te tūtohunga matua kua puta ake, kia whai tatau pounamu ngā Pirihimana e tū anō ai te hononga ki te hapori.

Kua āta mātai ā mātou karere i te pūrongo me ētahi o ngā pārurenga i te whārua o Rūātoki, i Tāneatua hoki

Ko te tekau mā rima o ngā rā o Whiringa-a-Nuku i te tau rua mano mā whitu i urutomohia ai te whārua o Rūātoki, me ētahi atu pito o te motu e ngā pirihimana toru rau neke atu.

Ko tā rātau i kimi ai ko ētahi taunakitanga mō ngā mahi whakatumatuma i whakapaetia mō tētahi rōpū, nānā i hū ake ai te hōparatanga Pirihimana o Operation 8.

I taua rangi, i hopukina ngā tāngata tekau mā whitu e te ture, ā, he mahi whakatumatuma ā-pirihimana anō i whakapaetia. Heoi i Rūātoki, i whakatūhia ngā waka katoa i uru rā ki te whārua, ka haurapatia, ā, i whakaahuatia, i uiuitia hoki ngā kaihautū me ngā pāhihi.