Kei te whakatikatikahia mai a Ōrakei Marae mō te tangihanga o Tākuta Ranginui Walker i mate inanahi. Ko tā Ngāti Whātua Ōrākei, he hononga tino nui ki waenganui i a rātou me Tākuta Walker e hoki kōmuri atu ana ki ngā porotū ki Takaparawhau i te tau whitu tekau mā whitu.
E horahia ana ngā tēpu i runga i te whakapae ka neke atu i te kotahi mano rima rau tāngata ka tau mai.
“We're really here just to help, because he meant a lot to you to Orakei and the people that he knew have all passed on with our parents," hei tā Rauaroha Karena Scott, he uri no Ngāti Whātua ki Ōrakei.
E roa ana a Rauaroha Scott raua ko Rongo Hawke e whakatika ana i te marae, a, e mea ana raua he honore nui tēnei te whakareri i te marae o Ōrakei mō Tākuta Ranginui Walker.
"Right from the onset of our marae you know it was him and quite a few others you know like that's how we got our marae," hei tā Rongo Hawke.
E mea ana te iwi kainga, he tino pou a Tākuta Walker mō o ratou tukunga kōrero mō ngā kēreme me ngā porotū a te iwi ki te karauna.
Hei tā Taiaha Hawke ka hoki ngā mahara, "I te wa i tū te whakawhetaina ki runga i a Takaparawhau i haramai tēra matua me ōna matauranga me ōna kōrero hei awhina hei tautoko i a matou i roto i tēra o ngā whawhai, nāna ano i poipoia tōku papa (Joe Hawke) kia tū tangata ai a papa i roto i ngā whare kōti."
Hei āpōpō, a te takiwa o te tekau mā tahi karaka ko Te Whakatōhea iwi tēra ka kawea, ka arahi i te tūpapaku o Tākuta Walker ki roto ki te whare o Tumutumuwhenua, tirahi mai ai mo te toru ra.
