Ki te whakataetae pā whutupōro mā te hunga rangatahi o Aotearoa, i tū ki Papakura i ngā rā whakangā, ko te reanga kei raro i te tekau mā whitu tau te reanga i tahuri ai ngā kaimātaki. Eke ai a Te Taitokerau ki ngā whiringa toa o te wahanga hanumi ki a Tāmaki Makaurau, ā, ko Te Waiariki tērā i eke ki te whiringa toa ki a Waikato i te wahanga tamatāne, heoi ko te pātai, ko wai i toa?
Ngā hua o te whiringa toa hanumi U17:
Ko te whai utu tā Tāmaki Mākaurau i tēnei tau, whai muri i tā rātou hinanga ki te kapa nō Whanganui i te wahanga hanumi i tērā tau.
I tēnei tau ko Te Tai Tokerau te hoariri, me te mea nei, i tutuki i a rātou te piro tuatahi.
Heoi, tautōhito ana a Tāmaki, ka whakaōrite i ngā piro.
Ka hoki atu a Te Tai Tokerau ki te rārangi piro o Tāmaki, ngāwari noa te whai hua.
I pērā anō a Tāmaki, kia tutuki ai tā rātou piro tuarua, ā, noho ōrite ana ngā tatau.
I puta tuatahi ai te ihu o Tāmaki i tā rātou piro tuatoru.
Heoi, nā ngā waewae kakama o tēnei nō Te Tai Tokerau i noho ōrite anō ai ngā tatau, e toru ki ia kapa.
E toru ngā piro o Te Tai Tokerau i te tīmtatanga o te haurua tuarua, kia ārahi ai te tukinga mā ngā māka e toru.
Ahakoa kotahi anō te piro o Tāmaki, ka wikitōria kē Te Tai Tokerau, ka riro i a rātou te taitara mō te wahanga hanumi tekau mā whitu tau heke iho, he ono ki te whā.
Ngā hua o te whiringa toa o ngā tamatāne U17:
Ki te wahanga tekau mā whitu tau heke iho mā ngā tāne, me te whai haere a Te Waiariki i te mētara koura.
Heoi, ko te hiahia o Waikato, ngā toa o tērā tau ki te whakangungu i tā rātou taitara.
Ka mutu, nā ngā toa o tērā tau te tuatahi o ngā piro e rua.
Heoi auraki mai ana a Te Waiariki.
I ngā meneti whakamutunga o te haurua tuatahi, e rua ngā piro o ngā kapa e rua, kia whā ki te toru ngā tatau ki a Waikato.
I te haurua tuarua, e toru ngā ekenga o ngā kapa e rua ki te rārangi piro, kia wikitoria a Waikato mā te kotahi māka, e whitu ki te ono.
