Pāorooro ana te reo o te rangatahi me te arohanui ki a Apirana Mahuika

Ko te whakapae kei ngā mano te nui o te tangata ka whakaeke ki runga o Tikitiki hei ngā rā nei ki te poroporoākī i a Tākuta Apirana Mahuika, inā rā i te rangi tuatahi i te rangi nei e hia rau kē i tae ake. 

I tae atu ngā ope mai i Kahungunu, Tūhoe, Ngāti Awa. Otira, i tae mai ngā tauira mai i ngā kura kaupapa Māori katoa o Te Tairāwhiti, kōrero ai mō ngā tāonga tuku iho kua mahue mai i a Tākuta Apirana Mahuika, hei kawe mā tēnei whakatipuranga.

Pāorooro ana te reo o te rangatahi me te arohanui ki tō rātou pāpā e tiraha ana.

E ai ki tētahi tauira, a Olinka Matete, “Ki au nei kua waiho ngā hū nui mā tātou ngā rangatahi, hei whakakī. Ko taku tino hiahia me whai tātou i ngā tapuwae kua waiho e Tā Apirana Mahukia.”

Inā te mātotoru o te kanohi taiohi i tae mai ki te tuku mihi, ki tā rātou, he tohu mō tōnā mana ki te ārahi i ngā rangatira mō āpōpō.

Hei tā tētahi atu tauira, a Ruawhaitiri Ngatai Mahue, “He tauira pai rawa atu ia mō tātou tēnei reanga, nōtemea, kei te pupuri tonu ia i te reo ake o Ngāti Porou, he mea tērā mā mātou o ngā uru o Ngāti Porou hei ako i te reo tika o Ngāti Porou ehara i te reo Māori anake noa iho engari ko te reo anake o Ngāti Porou.”

Ko tā rātou kōrero, koia tērā i whakatauira atu ki a rātou te rangatiratanga o te Māori, nāna hoki te huarahi i para mā rātou.

Ki tā tētahi tauira, a Kaneihana Dewes, “Ki te ako ngā rangatahi o ēnei rā i ana mahi, kua kite i te tipu me te whanake o ana mahi i roto i ngā mahi o Ngāti Porou te reo ngā tikanga Māori.”

Ahakoa kua wheturangitia tēnei ūpoko ariki o Ngāti Porou, kei te ora tonu ānā mahi i tēnei reanga.