I tuki meke ki te meke ngā whetu nui o ngā hākinakina whutupōro me te rīki ki Te Whanganui a Tara inapō kia kitea ko wai te hākinakina kei roto i te ringi.
"Mutu aku mahi whakaharatau mō ngā marama e rua, ka āhua reri au mō te rīngi heoi i uaua tonu ki roto rā," te kii a Shane Parata.
Kua waia a Randall Bishop ki te papa tākaro poitūkohu, ki te papa tākaro whutupōro anō engari kē te ringi mekemeke.
He whawhai mekemeke taurite tēnei ki waenga i a Randall nō te karapū whutupōro o Tawa me tōna hoariri. I te mutunga iho ko te tira rīki anō i tū rangatira ai whai muri i te whakatau kōihi o ngā kaiwhakawā.
Hei tā Randall Bishop, "Tērā pea ko te mea uaua rawa atu o taku oranga tērā, hei te rauna tuarua pau katoa taku hau."
Whakawhiti atu ki tētahi atu kaimekemeke, ki a Ihaka Dunn mō te taha whutupōro. E rua tekau mā tahi tōna pakeke nō Ngapuhi e whawhai atu ana ki a Daniel Sione.
Mārakerake ana te kitea te tere o ngā ringaringa me ngā waewae, engari hei tā Ihaka, kātahi te hākinakina uaua ko tēnā.
Ki te whawhai mekemeke matua o te pō, ki waenga i a Asher Derbyshire nō Ngāti Tūwharetoa me Scott Taliauli.
Kua whakangungu ngātahi a Asher ki a Shane Cameron kia whakarite ai ia mō tēnei whawhai, ā, i te rauna tuatoru i kitea ngā hua.
Ahakoa ko wai i toa i roto i te ringi i tēnei pō, pera ki tā Asher kōrero, ko te aronga matua ko te tautoko i te kaupapa hei kohi pūtea mō Cure Kids.
