Koianei te rā, i ngā tau tekau mā rua ki muri, i mate atu ai Te Arikinui, a Kahurangi Te Atairangi Kaahu. Ko tā te mema pāremata Māori o Tamaki Makaurau, he whakahoki mahara ki Te Arikinui, he arotake hoki i te Kingitanga i ēnei rā. Nāna te whāruarua o tōna matua i whakakapi hei mema o Te Tekaumārua.
E whiu ana ngā whakahē ki Te Kiingitanga i te wiki kua hori, whai muri i te reta, nā Tukoroirangi Morgan i tuku kei te wero i te Kiingi Māori hei poutokomanawa.
Engari, ko tā Peeni Henare, he pīkau i ngā mahi nui a tōna matua, a Erima Henare ki Te Kiingitanga.
“Kāore e kore i roto i te roanga ake o te koroneihana e tū nei ka āta wānanga mātou, tekaumaarua, anā, me te iwi o Tainui i ngā take nei,” i mea atu a Henare.
“Kua roa ētahi e mea, e ngau tuarā ana i te kaupapa o Te Kiingitanga.”
Nā wai rā i hē kātahi ka hē rawa atu whai muri ake i te whakauru poka noa a Te Tari Hara Taware i te tari o te Kiingi Māori. Hei tā Nanaia Mahuta he take nui tēnei mā te iwi.
“Kaare he kore he nui nga nawe me nga awangawanga kei waenganui i te iwi e pa ana ki te maha o nga kaupapa,” i kī atu a Mahuta.
He take pāpouri atu i te tau tekau mā rua mai i te matenga o Te Arikinui Te Atairangi Kaahu.
“E ngau kino tonu ana te whatumanawa i te ngarotanga atu o te Kuini,” te kupu a Henare.
“Ka korikori tonu ia i runga i te pae o mahara o tēnā o tēnā puta noa i te motu whānui, nō reira, ahakoa kua ngaro atu, kei te ora tonu tōna wairua ki roto i ngā mahi katoa o te wā.”
Ka tū tētehi karakia whakamaharatanga mō Te Arikinui Te Atairangi Kaahu ki Tūrangawaewae marae hei te pō nei.
Hei reira te Kiingi rātou ko ngā pononga e hui ai, hei mua i ngā whakatairanga o te koroneiha hei ngā rā whakatā.
