Pride in jersey restored for Auckland rugby fan

James Perry

Kua tekau mā tahi tau te roa a Auckland e noho kiri haunga ana, heoi kua noho pūmau tonu tētahi apataki kua roa e noho ana ki roto o Waikato.

I tipu a Lyndsay Snowden ki Tāmaki Makaurau i te wā o ngā tino toki whutupōro. Hei tāna, "He tipua rātou, i reira ngā parata Whetton, ngā parata Brooke, Sean Fitzpatrick mā." Kua whakaritea e ia i te kapa o taua wā ki ngā momo Atua, "he māmā i taua wā," tāna i kī ai.

Hei āpōpō tuki anō ai ngā tino hoariri whutupōro i te whiringa toa o te Mitre 10 Cup, a Auckland me Canterbury. Te whiringa toa tuatahi mō Auckland i ngā tau e toru, ka mutu, kua 11 tau mai i te whiringa toa whakamutunga i tū ki Tāmaki Makaurau. 

Ahakoa te kiri haunga o tōna kapa i roto i ngā tau tekau, kua noho pūmau tonu a Snowden ki tōna kapa, ki a Auckland. Hei tāna, "ki te huri tuarā i te wā e kerekere ana tō tima, kāore koe - ehara koe i te tino kaitautoko. Mā ēnā wā, o te kerekere, o ngā heke ka hanga te kaitautoko, nā te mea ka reka ake te wā o te Ao."

Ahakoa tōna whakapono mutungakore ki tōna kapa, kāore a Snowden mō te kaute moata i ōna hēki. Kei te mōhio pū ia ki te autaia o Canterbury. Hei tāna anō, "ehara i te mea he kura huna ngā mahi ka riwha i a Waitaha. I ngā tau kua hori, kāore rātou e ngana kia panoni i te māhere. He mātanga rātou ki ngā mea paku, ki ngā mea iti. Mōhio hoki rātou ki te huringa tai. Ko te tima ka wini, ka tutuki i ā rātou ngā mātāpono mai rā anō o te kēmu."

Kei Hapāni ngā mema Ō Pango o Canterbury, me te poutaha o Auckland me Dalton Papali'i. Heoi kua whai wāhi ngā Ō Pango Māori a Akira Ioane rātou ko Jonathon Ruru, ko Robbie Abel me Marcel Renata ki te tākaro āpōpō mō Auckland, engari kei te māharahara tonu a Snowden mō ngā āhuatanga ka pā ki tōna kapa. "He pai tēna kua whakaaetia e ngā kaiwhakahaere o te tima Māori kia tākaro ai ngā koroheke rā. Engari kei ā mātou te pēhitanga, kei ā mātou te taimahatanga kia toa," tāna i kīi ai.

Pai tū, pai hinga ko te mea nui ki te apataki nei, kua mana anō tōna pōraka i te kapa, ā e whakapono ana a Snowden kei te kā mai te rama o te ana roa kua noho nei ngā apataki o Auckland.