Mā Ngāti Hamua anō ōna whenua whakangau ki te awa o Ōhinemataroa e whakahaere, koinei te whāinga o te hapū o Ngāi Tūhoe, kua whakaroaroa ake nei i te rāhui mau pū, e toru wiki, hei whakamaru i ngā uri e hoki mai ana ki te wā kāinga.
Kua rāhui te mau pū ki runga i tēnei awa tae noa ki te rua tekau mā whitu o tēnei marama.
E ai ki a Kelly Kaata (Tapuiwahine, Ngāi Tūhoe), “He whakatūpato i ngā whānau i runga i te, ngā hararei, ngā tamariki, mokopuna kei te piki i te taha tonu o te tipuna awa, a Ōhinemataroa. He whakatūpato kia kore e mau pū ngā tāngata.”
Ko te hapū tonu kei te hēteri i te rāhui, mai i Ōhinenaenae ki Te Pūtere, ā, e whakaaro ana rātou kia rāhui ia tau, mai i te Hakihea ki Huitanguru.
“Kei te rahi tonu ngā whānau kei te hokihoki mai ki konei noho ai, a mātou tamariki, mokopuna, koinei katoa to rātou huarahi.”
Nō te tau rua mano tekau mā wha ka whakahokia atu Te Urewera ki a Tūhoe, hei mea whakahaere tahi mā Tūhoe me te Karauna . I tēnei rā, kua kite ake te hapū nei i ngā whakawhiu ki runga i te taiao.
Hei tā tētahi Manuka Apiata, “Kei te hoki ōku whakaaro i ahau i te kura tonu, kāre anō e tawhiti tō hikoi ka taria koe te kaute, rima tekau kē ngā taraute, ianei, he piki mahi te kimi kia rima tekau ngā taraute.”
Kāre anō te aitua mau pū kia pā noa nō ngā tau ono tekau rā anō, heoi ko te whainga matua tonu, marutau te noho a ngā uri.
