Nō te rā nei wehe atu ai te kapahaka o Raukura ki Potugual ki te kimi manawataki i mua i te whakataetae kapahaka ā motu mo ngā kura tuarua hei te rua wiki e tū mai nei. E ai ki ngā kaiako ma te hāere ki tāwāhi ka whai wheako mutunga kore ai ngā tauira, te nuinga ō rātou kaare anō kia wehe atu i Aotearoa nei.
Tekau mā ono rā kei mua i te aroaro mo ēnei pouako, tauira o ngā kura tuarua Tāne, Kōtiro o Rotorua i a rātou e haere ana ki tāwāhi ki te whakaatu i te ahurea Māori.
Hei tā Kimiora Webster, te pouako o te kapa Raukura, “To mātou hiahia ki a whakaatu te ao ki ngā tamariki, ki a whānui ake to rātou titiro ki te ao puta noa i o rātou kainga, na te mea ko te nuinga o ngā tamariki kāre anō kia eke ki runga i te eroperaina, kāre anō kia haere ki tā wāhi.”
Rima tekau mā tahi ngā mema ki roto i tēnei tira, whā tekau mā ono o rātou he kaihaka. Ka tū rātou ki roto i te taiopenga 'Folk Cantanhede' kotahi wiki te roa o taua hui i timata i te tau rua mano ma ono. Mo te nuinga o ngā mātua, ahakoa te oho moata ko te wairua manahau te aronga nui .
Hei tā Piki Thomas (Te Arawa), “Kia pai tana haere, me tūpato hoki i a ia e hikoi haere ana i roto i ngā whenua, i roto i ngā taone nunui o Uropi, ā, me hoki ora mai ia, na te mea he kaupapa ano kei mua i a ia me kī rā te kapa o Raukura. Pai ki a haere ki reira ki te whakaatu i ngā tūahuatanga o ngāi tāua te Māori engari kāua e wareware kia kite i ngā tūahuatanga katoa o aua whenua.”
Ia tau ka kōpūtahi ai ngā kura tuarua Tāne, Kōtiro o Rotorua kia tu hei kapa ara ko Raukura ki ngā whakataetae, ā rohe, ā motu hoki. I tēnei tau ko rātou tētahi o ngā māngai mo Te Arawa ki ngā kapa haka kura tuarua o Aotearoa ka tū ki Te Matau a Maui.
E ai ki a Webster, “Mo mātou o Ruakura, ko te whakataetae te mea tuarua, ko te ako i ngā ōati, i ngā whēako me te hoatu i ngā whēako ki ngā tauira te mea nui, ā, ko te whakataetae hei kīnaki i ngā kōrero me ngā whakaakoranga e ako ai ngā tamariki.”
Mai i Rotorua i haere te kapa ki Tamaki Makaurau, ā, i rere atu rātou ki tāwāhi i te kotahi karaka i tēnei ahiahi.
