Robert Gillies hoia Māori ka tae ki te tautoko i te pakipūmeka

Ko Robert Gillies, mema o kamupene B o te ope taua rua tekau mā waru o Tūmatauenga tētahi o ngā manuhiri tuārangi ka tae ki te whakakitenga pakipūmeka o "Kia Ora" he whakaaturanga mo te ope taua rua tekau mā waru ki Itāria.

Hei tautoko i a ia he ope nō te rōpū hoia o Te Arawa me ngā whānau o te kamupene B ka tae atu. Ia tau ka tau mai ngā mema o te rōpū hoia ō mua o Te Arawa ki te whakarite mo te rā whakamaumaha o ngā hoia ki Muruika. Engari i tēnei tau, he ope tā rātou ka haere ki Te Whanganui a Tara hei muri i te rā o ANZAC ki te tautoko i tētahi o rātou. Ki tā Laurie Morrison tētahi kei te haere ki Te Whanganui a Tara, “i te wā i mōhio rātou kei te haere a Bon Gillies i rere ngā whakaritenga hei tiaki i a mātou katoa”.

Tekau mā rua ngā kaumatua, ko Robert Gillies, te hoia whakamutunga o kamupene B tētahi o rātou ka haere ki te tautoko i te whakaaturanga o te pakipūmeka e titiro nei ki ngā mahi o te ope rua tekau mā waru ki te pakanga. “He tangata tino whakaiti ia i kōrero atu ahau ki a ia ka mea atu he kaupapa tāukiuki tēnei, ā, ko te mea mīharo kua whakarite mātou kia haere hoki tētahi o ana mokopuna ki tona taha”.

Toru mano, ono rau ngā hoia o te ope taua Māori i haere ki te pakanga mai te tau wha tekau ki te tau wha tekau mā rima. O ēnei hoia, ono rau, wha tekau mā iwa o rātou i mate. “I mōhio mātou he wāhanga nui tō te ope taua Māori o heoi he mea mīharo kia tūtaki te whānau Corsini ki a Bonbon Gillies” ki tā Morrison. Ka tū te whakakitenga ki Te Herenga Waka Marae hei tēnei Rāpare a te ono karaka i te ahiahi.