He tuatahitanga kia tokotoru kē te hunga whiwhi i te Karahipi o Mona me Sonny Riini mō te tohu paetahi, mō Te Huarahi Māori, he tohu mō te whakaako i te reo Māori nā Te Whare Wānanga o Tāmaki. Ko te hiahia a ngā kai-whiwhi karahipi nei, kia au noa ai te rere o te reo Māori i ngā kura katoa, kura kaupapa Māori mai, kura auraki mai.
E tōminamina ana te ngākau o Jordan Kaie mā ngōna pukenga e Māori ai te reo i roto i ngā kura auraki ā tōna wā.
“Ko mātou ka puta atu ki ngā kura auraki, ko te nuinga o ngā tamariki i reira, āhua itiiti noa te reo, nō reira, tō mātou ko tēnā te hiahia kia rere te reo Māori i ngā wā i ngā wāhi katoa.”
Ko rātou ngāna hoa tauira hei kaiako i te reo Māori ka whakawhiwhia ki te karahipi i tēnei tau. E whitawhita ana rātou kia rangona ai te reo i ngā kokonga katoa.
Hei tā Blanche Saua, “E hiahia ana ahau ki te whakaako ki roto i tētahi kura kaupapa Māori, nā te mea e hiahia ana au ki te kōrero i te reo Māori ia rā ia rā.”
E ai ki a Horowaitai Roberts-Tuahine, “Ko te patu i te whakamā. Ā, whakamā rawa atu a ngāi Māori ki te whakamahi i te reo Māori, nā te hapa, nā te kōhete o tētahi mō te hapa.”
I ngā tau tekau mā iwa ki muri i whakatū ai taua karahipi, ā ka tapaina ki te ingoa o te kaumatua tuatahi o Te Huarahi Māori, o Sonny Riini i tōna matenga, ka mutu, ka tāpirihia te ingoa o tōna hoa rangatira i tōna matenga, hei huruhuru mā ngā tauira tau tuarua.
Hei tā te Toihau Whakahere Hōtaka Reo Māori a Hemi Dale, “Ko te mea nui, ko ngā ko ngā koha, ko ngā taonga kei a rātou, kia kohaina ērā taonga kia tātou tamariki, mokopuna e ako nei i roto i ō tātou nei kura. Kia mau ai hoki tērā tupuranga, ngā whakatupuranga rānei.”
Ka aro rātou ki te whakaako i ngā kura i Tāmaki Makaurau kia tutuki ai ā rātou tohu mātauranga ā tērā tau.
