Shortage of waka paddlers at Waitangi inspires a new generation

Nā ruarua o ngā kaihoe ki Waitangi i tēnei tau, kua tahuri ake te titiro ki te whakareanga kei te haere ake, mā rātou te tikanga rā e kawe ki tua i raro i ngā tohutohu a ngā mātanga waka o te wā nei. 

E mānu ana i roto i te ngākau o Joe Conrad te hiahia kia aro mai te tangata ki te waka Māori.

Ko tā Joe Conrad - Kaihautū, Ngātokimatawhaorua "Tēnei waka kei roto i ahau, he kaitiaki i ahau, he kaiawhi i ahau."

Mai i te tau whā tekau te waka taua mataamua a Ngātokimatawhaorua e tau ana ki ngā rā o Waitangi, ā, ko ia te whakamīharotanga nui, engari hena e torutoru noa iho ana kaihoe, ka kore pea e kitea ai ia.

Hei tā Rutene Gable – Kaihautū, "Haramai ō tātou rangatira, ō tātou pīpi, ngā tamariki e nipa tonu ana ka kuhu mai ki runga i ngā waka ka whakangūngu tahi ki ā mātou tau tōhito nā reira he tohu pai tērā ka ora tēnei kaupapa."

E ai tā Te Tohunga Tārai Waka Tiketike a Hekenukumai Puhipi me nui atu ngā nama kia kore e pēnei noa.

Ko tā Hekenukumai Puhipi - Tohunga Tārai Waka, "Pena he Māori tātou, me ū tonu tātou ki te kaupapa waka, i runga anō i te āhua o ā tātou nei tupuna te haere moana i ō rātou rā."

Rawa atu, ko te haerenga mai o te waka hourua a Ngāhirakamaitawhiti.

Hei āpōpo timata ai te terenga waka nei mai i Haruru ki Waitangi mō te rangi whakamahara i Te Tiriti.