E ono ngā kapa Kura Tuatahi kua eke ki te pae o ngā whakataetae Kapa Haka o ngā Kura Tuatahi o Tāmaki Makaurau. Ko Te Kura Kaupapa Māori o Hoani Waititi, ko Ngā Tapuwai, Te Kura Kaupapa Māori-a-Rohe o Māngere me Puau, Henderson Intermediate, rātou ko Clendon Park ka ahu tōtika ki ngā whakataetae kapa haka a motu hei tēra tau. Anei ngā whakanekeneke o te whakataetae i ēnei rangi okioki.
Hei tā tētahi Kaiwhakawā a Ruki Tobin, “Ko te mea nui kia whakatō i te kākāno o te kapa haka ki roto i te wairua, i te ngākau o te tamaiti. Ki reira waiho ai kia tupu matomato mō ngā tau kei te heke mai.”
Ki te whakataetae kapahaka kuratuatahi o Tāmaki Makaurau, nei rā ngā hua o te whakaharatau i ngā wā whakangā me ngā wā tina.
E ai ki te Tumuaki o Te Kura a rohe o Māngere a Lucy Te Moana, “Kei te tino harikoa ngā whānau kua kite o rātou tamariki e eke ana ki runga i te ātamira. Ngā e rā e rua, he rā whakahirahira.”
E rua tekau ma rima ngā kura tuatahi katoa i karahui ki te Kareti o Kia Aroha i Ōtara mō te pakanga nui i te papa whakatūwaewae o Tāne Rore, o Hineterēhia. Mō ngā hia marama ēnei kura e parakatihi ana kia eke ki ngā taumata o ngā whakataetae ā motu.
“He uaua ki te whakaharatau i ngā tamariki nā te pīwari, nā te ātaahua. Ka rua nā te kaha manaaki o Kia Aroha he uaua ki te whakarite te tinana mō te Matatini ma te taha ki te kai. Heoi anō, he pierenuku pai ēra e tohu ana i te nui o te kaupapa,” hei tā Tobin.
Tokomaha ngā kura auraki i uru tuatahi mai i tēnei tau. E ai ki Lucy Te Moana, e hiki ana ngā taumata kapa haka ia tau puta noa i te motu whānui. Inā te ora o ngā mahi a ngā tūpuna i waenga i ēnei punua kaihaka Matatini.
“Ki oku whakaaro ahakoa ngā roopu o Tāmaki Makaurau, he nui atu ngā rohe e ōrite ana ki ngā ropu o tēnei rohe,” hei tā Te Moana.
Hei tērā tau tū ai ngā whakataetae a motu ki Te Tai Rāwhiti.
