Ki ngā whakataetae kapa haka a ngā kura tuatahi o Waikato. He piko, he taniwha, he piko, he taniwha te āhua o ngā kapa autaia. E ono rātou kua tohua kia haere ki te Kura Mana Tahi, ngā whakataetae kapa haka a ngā kura tuatahi o te motu hei tērā tau.
Ko ngā uri whakatipu o Tainui te karanga o te rā.
Hei tā tētahi Kaiako a Keihana Kingi-Takoko, “Kei hea he wāhi i tua atu o te mahi kapa haka ki tō tūrangawaewae ake."
Nā te taiwhanga o Claudelands te kaupapa a-rohe o Waikato mo ngā kura tuatahi i whakahaere e kite ai tātou i ngā kapa e whakataetae ana mo ngā tūranga e ono ka uru atu ki ngā whakataetae a-motu ka tū ki Tūranganui a-Kiwa. I tēnei tau ko ngā toa o te wā, ko Te Wharekura o Rakaumangamanga.
"Ia tau ka mea atu ahau koinei tā mātou whakataetae a-motu, ā, kei te kainga, kei mua i te aroaro o te rahi o te kainga. Kā mutu kei roto i te toto tēnei āhuatanga o te kapa haka. Nōreira e mea atu ana ahau, kāre e ngaro tēra wairua o Taniwharau, o Te Pou o Mangatawhiri, o Ngā Pou o Roto, o Te Iti Kahurangi, Mōtai, a wai ake, a wai ake. Koinei te āhuatanga e muia ana e te āo kapa haka," hei tā Kingi-Takoko.
Neke atu i te ono rau ngā tamariki mai i ngā kura tekau mā ono i tū mo te wā tuatahi ki Claudelands, i mua hoki i ngā kaiwhakawā rua tekau mā rima.
E ai ki tētahi kaiwhakawā a Tokoaitua Winiata, “I hui tahi ngā kaiwhakawā me te komiti whakahāere. Ko tētahi whainga nui a te komiti whakahāere i tēnei tau kia whakanoho nei i te hunga e haka tonu ana i runga i te ātamira i runga i te papa whakatūwaewae ki te Matatini. Nōreira koira i taiohi nei te hanga o ngā kaiwhakawā. He pūnaha nui mo te iwi ki te āta poipoi i ngā kaihaka o te kura tuatahi kia tū ake rā ki runga o te papa tūwaewae o ngā kura tuarua, o Te Matatini hoki.”
Whai muri mai i a Rākaumangamanga, ko Te Kura Kaupapa Māori o Te Ara Rima i te tūranga tuarua, ā, ko Bernard Fergusson te tūranga tuatoru. Kā mutu, nā Te Wharekura o Te Kaokaoroa o Pātetere te turanga tuawhā i kapo ake, ka tuarima a Te Wharekura o Te Rau Aroha me te maringanui hoki mo Te Roopu Kapa Haka o Nooera i riro ake i te tūranga tuaono.
