Ka whai waahi ngā tauira o Te Mana Ākonga ki te wero i ngā kaitorangapū ki tētahi tautohe i te hui a tau o Te Huinga Tauira i Tāmaki Makaurau i te rā nei.
Ko tētahi o ngā take nui he ōrite te tautaki moana ki te rangatiratanga taua tautohe ko te rangatiratanga ki te wai.
E mea ana a Shane Taurima o Te Pāti Māori, ko te take ki te wai Māori, te takutai-moana o nāianei.
Tā Shane Taurima, kaitono mō Tāmaki Makaurau "He rite tonu ngā kōrero a Reipa ki ā rātou kōrero i te tau rua mano mā whā. Tā rātou anō, kei te katoa te mana ki te wai, ā, koira ngā kōrero mō te takutai moana. Koira i tukuna ngā mana ki te Karauna."
A, e whakaae marika ana e Kelvin Davis, tumuaki tuarua o Reipa.
Tā Kelvin, "Kahore e tika ana kia aukati te tāngata i tāna huarahi ki te kōti ki te wero i ōnā tika. I hē te mahi a Reipa i te tau rua mano tekau mā whā. Nā reira ko tā mātou ko Peeni Henare, ko Kiritapu Allan, ko Willow-Jean Prime he anga mua atu me Reipa, kia kaua rā anō a Reipa e pērā anō."
Tā Hone o Mana, "Ehara i a Kelvin tēnei take, ēngari i tāhae marika e rātou tō mātou takutai moana. Kahore hoki mō te hiahia ki ngā kōrero whakapaaha, whakahokia mai! Kia whai waahi atu ō tamariki mokopuna te mana anō ki te takutai moana."
Koni i te rua rau whitu tekau ngā tauira kua tae mai ki Tāmaki Makaurau, ā, mō Te Huinga Tauira anō te take. Tēnei rā, whai waahi atu rātou ki te wero i ngā kaitōrangapū.
Tā Tremaine Teaukura o Te Kunenga ki Pūrehuroa, "E hiahia ana au te tuku i tāku pōti ki a Reipa, ēngari e māharahara ana au ināianei."
Tā Mamaeroa Merito o Te Whare Wānanga o Tāmaki Makaurau, "Kahore hoki i kitea he tino toa, ēngari he pai te whakarongo ki ō rātou kōrero. Ēngari i te taiapa tonu ahau e whanga ana."
Tekau mā rima rā ka tū te rangi pōti, me tā Reipa e tumanakohia ana, ka whai waahi tonu mai te au o Jacinda Ardern ki ngā pōti a te rangatahi.
