Tā te Kāwanatanga uapare mō te kaikiri ki ngā tauira Māori

Kua puta te whakatau a te Mīnita Take Mātauranga, a Chris Hipkins e pā ana ki te hiahia a te Kāwanatanga ki te whakawhanake i ngā mahi a ngā tauira Māori. E whai ana tēnei i ngā whakawhiu i hua ake e pā ana ki te tītaha o te titiro a ētahi kaiako kura auraki ki ngā tauira Māori

E whakarongo ana te Kāwanatanga ki ngā whakawhiu e pā ana ki te tirohanga kūare a ētahi kaiako ki ngā tauira Māori e kuraina ana ki ngā kura auraki.

Ko tā te Mīnita Take Mātauranga ki a Te Kāea. Kua kōrerohia tēnei take e te kaikōmihana tamariki e Andrew Becroft, ā, me whakarongo rātou ki a ia. E aronui ana rātou ki te whakawhanake i ngā mahi a ngā tauira Māori engari me haumaru ake te taiao o te akomanga. Ka mutu, he take tēnei ka pā atu ki te katoa nō reira e aro atu ana a Kelvin Davis ki tēnei kaupapa.

E ai ki ētahi rangahau i tonoa mai e te Tāhūhū o Te Mātauranga ki a Te Kāea i te rā nei, kāore i tino eke ngā whāinga a ngā kaiako mō ngā tamariki Māori, ā, kāore rātou i whai whakaaro ki ngā tukunga iho o a rātou rautaki whakaako ki ngā tauira.

He kaiako a Ranginui Rikirangi-Thomas ki tētahi kura auraki. Ko tāna, me wawe te whakatika a te kāwanatanga i ngā tirohanga o ngā kaiako ki te hunga Māori e ako ana ki ngā kura auraki.

Ko tā te Kāhui Tika Tāngata ki a Te Kāea, he iti ake i te rima ngā amuamu kua tae atu ki tō rātou tari e pā ana ki te kaikiri kūare ki ngā tauira Māori i roto i ngā tau e toru kua taha ake nei.