Tasman return to top of the Mitre 10

James Perry

Kīhai a Manawatū i eke panuku ki a Tasman i te Mitre 10 Cup, ahakoa i hoki a Jackson Hemopo raua ko Otere Black ki te aro-ā-kapa, ko ngā Mako tēra i angitu, 29-19 ki Te Papaioea.

I hoki a Otere Black ki te whīra tākaro i tēra wiki, 30 mineti ia i tākaro inā pō, tōna tākaro tuarua i ngā marama tekau mā tahi, whai muri i te wharanga ki tōna pona i tēra tau.

I paku kitea tōna pitomata, ka mutu i te kaha anō hoki o te Ōpango hou, o Jackson Hemopo i tōna tākaro tuatahi mai i te Game of Three Halves i tērā marama, heoi auare ake.

I whai piro ngā Turbos i te weheruatanga, i mua te haere o Tasman 14-12. 

Heoi, hoki atu hoki, ko ngā hāmene e pēhi tonu nei i a Manawatū. Hei tā te kāpene, hei tā Antonio Kirikiri, neke atu i te 30 ngā hāmenetanga o tōna kapa i ēnei tau, ā i piki rā anō taua nama inā pō. A ko ia tērā i whai kāri kōwhai mō tētahi rutu teitei i te wehenga tuarua.

Nō te wikitōria, kua hoki anō a Tasman ki te tihi o te whakataetae Mitre 10 Cup Premiership, ki te taha o te kapa hingakore, o Auckland.

Heoi anō, ehara i te mea he māmā noa mō ngā Mako i Te Papaioea. Hei tā David Havili, kāpene o Tasman, he kaha te kōkirikiri o Manawatū mō te roanga o te kēmu, ā i kaha hoki ngā hapa o tōna kapa. Me matua whakatika tēra āhuatanga hei te Rātapu i tō rātou tukinga ki a Counties-Manukau ki Whakatū.

I angitu a Manawatū ki a Waikato i te kēmu tuatahi o te tau, heoi kua heke ngā Turbos ki tō rātou hingatanga tuarima karapīpiti. Heoi i kitea e Kirikiri ētahi painga, he mea awhero i a rātou ā haere ake nei. Hei tāna, kua mate rātou ki te whakatika i tō rātou rārangi ārai. Heoi, nō nā pō i pakari taua rārangi rā, ā i pau te hau o Tasman ki te whakawhiti i te rārangi.

Hei te Rātapu anō a Manawatū hoki ki te papa tākaro. whakauhi ai i a Wellington ki Te Papaioea.