Te āki a tētahi toa KiwiYo kia mutu te meinga atu ‘Kia ora’ ki ngā kaihoko

updated

Ko te āhua nei kei te haere tonu te whawhai kia kaua te reo rangatira e takahī i ngā āhuatanga ā-tauiwi. 

Koinei te āhuatanga mō tētahi kōhine o te Tai Tokerau kua wehe mai i tana tūranga mahi nā te ture o taua kamupene kia mutu tana mihi "Kia ora" ki ngā kaihoko. 

Nā te tono a ngā rangatira o tētahi pakihi kia mutu te meinga atu "Kia ora" ki ngā kaihoko, ka whakamutua e Monet Clarke tana mahi mā KiwiYo.

Hei tā Monet, “He pouri tōku ngākau nā te kore whakaaetia kia kōrero au i tō mātou reo rangatira, ā, ehara tērā i te tikanga.”

He toa whawhai mō tō tātou reo rangatira engari he kangakanga kē te reo i hiahia ai a Naida Glavish te tuku mō tēnei āhuatanga.

E ai ki a Naida Glavish, “E hia rā ngā tau kua pau ia tātou e whawhai ana mō tō tātou reo tatū iho ake ki te reanga āmuri iho ake e whawhai tonu ana.  Heoi ano e mihi atu ana au ki te kōtiro nei mō tōna māia ki te pupuri tonu i te reo rangatira o te whenua nei.”

I kōrero-a-waea a KiwiYo ki ngā mātua o Monet mō te kaupapa nei, arā, kia ū ngā kaimahi ki te reo kotahi hei whakatau i ngā kaihoko engari he kōrero anō tā rātou i tēnei rā.

Ahakoa tana koremahi iaianei, kua kitea e Monet ehara te whawhai mō te reo rangatira i te mahi ngāwari.

He reka ngā kai o KiwiYo engari kua kawa kē ngā tāwara o ētahi.