He tekau mā iwa ngā aituā i runga i ngā huarahi i tēnei tau ināianei, he pikinga ake whai muri i tētahi tukinga waka whakatetonga i Whangarei i te ata tonu nei. Ahakoa te taikaha a te Manatū Pirihimana ki te pānui i āna whakatūpato me āna ture, kāore tonu te hunga taraiwa i te aro.
Hei tā te Tūmuaki ā-Rori, tā Peter McKennie, ka whai tīkiti ngā kaihautū waka inā ka eke i te pae tere mā te whā kiromita ia haora. E aro pū ana ngā pirihimana ki te pae tere, ki ngā kaihautū haurangi me ētahi atu whanonga ka kitea ki runga i ngā rori.
Ahakoa ngā whakaritenga whakatūpato a te Manatu Pirihimana e aro atu ai te whakahaumaru, ki te whakaheke i ngā aituā rori, auare ake.
Hei tā McKennie, 19 ngā matenga rori i tēnei wā mō tēnei tau. Ko te hiahia o ngā pirihimana kia hautū haumaru ki runga i ngā rori.
E kore pea e ngāwari noa ngā ture haumaru rori a te Manatū, inā hoki e whakatata mai nei ngā hararei whakanui ā rohe, ngā hararei o Waitangi, me te aha ka tīmata anō hoki ngā kura.
Ko ēnei ngā tatauranga i whakatūturuhia e pirihimana Peter McKennie i tēnei ata tonu.
