Te Kapotai hapū released from mandate

Kia puta te hapū o Te Kapotai i waho atu i te rautaki whakatau kerēme  o Ngāti Wai.   Koinei te hua o ngā kokiritanga a ngā uri no te whakaaetanga a te karauna ki te mana a te Poari o Ngāti Wai ki te whakatau i o rātou kereme tiriti.  Engari ara atu anō ngā hapū e hiahia ana kia puta ki waho o tēnei whakarite a te karauna.

E karekare ana ngā wai ki te kāinga matua o Te Kapotai i te rongotanga ake kua whakaaetia kia puta ake tēnei hapū o Ngāpuhi i te mana whakatatu o Te Paori o Ngāti Wai.

Hei tā Patu Hohepa (Te Kapotai / Ngapuhi), Ki a au he pai tēnā, kia hoki mai anō te mana o Te Kapotai mā rātou anō rātou e whakahaere.  Ko te hiahia a Te Kapotai tō rātou whakapapa kia hono tonu atu ki ērā o Rāhiri i runga anō hoki i tā rātou hiahia nō Ngāpuhi mātou katoa.

He take tautohetohe, arā atu anō ngā hapu o roto o Ngāti Wai kua kokiri ngātahi i tēnei take ki te aroaro o te Taraipiunara o Waitangi me tāna whakaae kia noho ohorere ia ki te whakatewhatewha i taua mana i tukuna e te Karauna i te paunga o tērā tau.

Ko tā Huhana Lyndon (Ngati Rehua / Ngati Wai),  Koirā tētahi o ngā pātai nui ki ngā tarahiti o te poari o Ngāti Wai, he aha te take ka tukuna e rātou i a Te Kapotai, me pēhea ngā hapū katoa e hiahia ana ki te puta atu ki waho.  Ko ētahi o Te Whakapiko, ko Te Waiariki, ko Te Patu Harakeke hoki. Me kī horekau te poari e kōrero ana ki ō rātou hapū i te tuatahi.

Horekau Te Poari o Ngāti Wai i pai kia tuku kōrero mō tēnei take i tēnei wā, engari e mea ana ngā hapū kaikerēme, anō ngā ritenga o tēnei take ki te mana whakatatū i a Ngapuhi i tukuna e te karauna ma te rōpū Tūhoronuku.  Nā, taka mai ki tēnei rā kei te whai i ngā tutohutanga a te taraipiunara kia hoki atu mā ngā hapū anō ngā hapū e kōrero.

Hei tā Hohepa, “Ko tēnei ki a au, ko te Karauna e takahi nei i te mana o Ngāpuhi, e takahi i te mana o Te Kapotai, e takahi ana hoki i te mana o te rangatiratanga o ngā hapu.  Mā ngā hapu anō rātou e kōrero, ehara mā te Karauna.”

Hei te wiki tata nei tū ai te wānanga ture o te Taraipiunara ki te whakatika mō tana nohonga ohorere ki te whakawā i tēnei take.