Ko te whakapiki i te tokomaha o ngā rōpū kapa haka e karore haere ana i te ao, tētahi o ngā kaupapa matua ka kōkiritia e te Matatini, i te 50% neke atu o te pikinga pūtea mōna.
Koinā tētahi o ngā whakaputanga i puea ake i te rā nei, i te pōwhiri ki te Tāhūhū Rangapū hōu o Te Matatini. Kei a Heta Gardiner tēnei pūrongo.
Ko te tāhūhū rangapū hōu tērā i pōwhiritia ki ngā reo e rua.
Engari ko ngā reo rōreka o ngā kapa ērā, ka whai wāhi ki tāwāhi, te hua o ngā pūtea hōu, ki ngā pūkoro, o te rōpū whakahaere.
E ai ki te tiamana o Te Matatini, Selwyn Parata, “Kei te haere tētahi o ngā kapa haka o Opotiki Mai Tawhiti a nga marama e tū mai nei ki Taiwan. Nōreira ko ēnei ētahi o ngā āhuatanga kei te whāia, kia puta tēnei kaupapa ki te ao.
Koinei te whakaputanga tuatahi, mō te rautaki e whakatakotoria ana, mō ngā pūtea tāpiri kua uru ki ngā pūkoro o te Matatini. Ko te rahinga he $700,000.
E ai ki te kaihaka Tāpeta Wehi “He mea pai tērā, ēngari, ko tāku kia piki ake te pūtea kia ōrite ki te ballet.”
Ko Tāpeta Wehi tētahi o te hunga i tipatere atu ki Kotirana, haka ai ki te Military Tattoo. E whakaae ana ia he hua nui te tuku pūtea, ki te tono i ngā rōpū ki whenua kē.
E ai ki a Wehi, “Etahi o mātau he hāwhe kotimana, he hāwhe Māori, ka tū ake mātau ki te whakangahau ia rātau, aa ka tata tangi te nuinga o ngā kaimātakitaki, i te kite i te wairua o te Māori.”
Ahakoa tērā, e ai ki tēnei mātanga haka, me aro hoki ētahi o ngā herini hōu, ki ngā pakiaka o te kaupapa.
“Me toro atu i ngā pūtea ki ngā rohe katoa, ki ngā rōpū katoa o te motu.”
Hei ngā wiki tata nei, ka hui tahi te maha o ngā kaiwhakahaere o Te Matatini, ki te whakatakoto rautaki, mō ngā pūtea hōu.
