Te poroporoāki whakamutunga ki a Tākuta Apirana Mahuika

E hia manomano tāngata i tau mai ki Te Rāhui Marae i Tikitiki ki te tuku mihi ki te rangatira o Ngāti Porou, ki a Tākuta Apirana Mahuika, i hinga i te Rāhina i tōna tau waru tekau.  Kua whakaritea ia ki te tōtara haemata i te wao tapu nui, nā whai te rere o ngā kare ā roto i tōna uhunga, i mua i tōna taenga atu ki tōna okiokinga whakamutunga.

Whakarārangi ai ngā uri o Ngāti Porou i te ara i kawea ai te upoko ariki ki tōna okiokingaroa.

Tīwēwē ana ngā kare a roto, tangi hotuhotu ana te ngākau.

Tae motuhake mai ai ngā minita o te Kāwanatanga i mahi i tōna taha, ki te poroporoāki i a ia.

Hei tā Te Ururoa Flavell, Kaiārahi o te Pāti Māori, "Ko tēnei momo tangata he momo e kore e kite i te wā kei mua i te aroaro nō te mea  i taua whakatipuranga, āta wānanga, āta titiro ki te whānuitanga o te kōrero.  Nō reira ka whakatau i te huarahi hei whāinga māna."

Ki tā Kuini Moehau kōrero, "Ko te ara whakamua o naianei kei te hua ake ngā hautipua mai i te whenua, mai i te taiao, mai a rangi, koina ngā kākano kua ruia e te koroua nei."

Ki waenganui i ōna tipuna ki te urupa o Kaitaha takoto ai, te maunga e kore e nekeneke.