Rua mano te hunga i tae atu ki te hui atahāpara o ANZAC ki Te Papaiouru, Ōhinemutu ki Rotorua. Ia tau he kaupapa e kukume nei i te hunga taiohi, pakeke hoki. Ki tā Monty Morrison, “I timata, i haere mau ai ki konei mai i ngā tau kotahi mano iwa rau, rima tekau pea ka timata i konei ki te taha o tōku pāpā me ōku koroua. Kuia mā, rātou ka tae mai ki konei, nō reira mai rā ki tēnei wā i konei ahau”.
He tikanga tuku iho kia tae mai ki tēnei huinga mo Monty Morrison me ngā whānau o Ōhinemutu. “Tēnei rangi maumaharatanga a rātou kāre i hoki mai ki te kainga, koira te mea tino tika”. Ko Haane Manahi tētahi o ngā hoia rongonui i whānau mai ki Ōhinemutu. I whakanuia ia ki te pakanga ki Tunisia ki te pakanga tuarua o te ao.
Ki tā Ngahihi o te ra Bidois “ko te akoranga nui, ko te maumaharatanga o ngā tūpuna i haere i reira me kāre rātou i hoki mai, he pai hoki ngā tāngata e mahi pērā i ēnei rā, ki te maumahara a rātou mahi mo te rangimarie”.
Mo te mema Māori o Te Waiariki a Tamati Coffey “Kia tū tātau ki te whakaaro mo rātou kei tāwahi, rātou i whakapau kaha kia ora tātau i tēnei rā”. Tata ki te rua mano ngā Māori i uru ki roto i te ope taua Māori ki te pakanga tuatahi o te ao, ā, toru mano ono rau ngā Māori i haere ki te pakanga tuarua o te ao ki raro i te ope taua Māori rua tekau mā waru atu i te tau wha tekau ki te wha tekau mā rima. Ki tā Henare Macown, Perehitini tuarua, Ngā hoia o Te Arawa “kei te pouri nui, ngā hoia katoa, o ngā whānau, o ngā whānau katoa o ngā Māori. Ko te tangi nē, ko te tangi ki ahau”.
Mo Rotorua ka tū anō ngā hui whakamaumaharatanga ki Whakarewarewa me Te Paepaekumana Motutara.
