Te Rā hei whakamaumahara i ngā Pakanga whenua Māori o Aotearoa

Kua tohu te rua tekau mā waru o Whiringa a Nuku hei rā whakamaumahara i ngā pakanga whenua Māori, heoi e rere ana ngā whakawhitinga kōrero ki Te Awamutu kia kite mehemea koinei te rā tika hei whakahaere i tēnei kaupapa maumahara. Ko te hiahia a te Minita Whanake Māori kia takoto te rautaki māhere hei whakamaumahara i ngā pakanga whenua Māori o Aotearoa engari ko tāna kia tika ngā mahi. “E āta whakaarohia tonu ngā iwi ki tērā rā, ko ta rātou tino aronga ko ngā kaupapa kē kei waenga i to rātou ake rohe, whakapakari i ngā kōrero hitori, ara ngā rā maumahara ki a rātou i te tuatahi” ki tō Nanaia Mahuta. Kei Te Awamutu ngā iwi e wānanga ana mehemea kua tohua e rātou te rā tika. Heoi, ko te whakahau mai i ngā rangatira o Te Tai Tokerau ka noho tēnei rā hei tohu hainatanga i Te Whakaputanga o te Rangatiratanga o Nu Tirene. Ki tō te heamana o Te Pūtake o te Riri ki Te Tai Tokerau a Aperehama Edwards “ka mahue te whakaputanga ki muri, ka ūhia ki tēnei kaupapa, ka warewarehia atu ko te whakaputanga ara te kaupapa i hainatia e o mātou tipuna, teina i te wā i a rātou”. Nō te tau tekau mā rima, na te ākina mai ētahi tauira nō te kāreti o Ōtorohanga kia whakawāteahia e te kāwanatanga tētahi rā hei whakamaumahara i ngā pakanga whenua, na whai anō i whakatū te pūtea o Te Pūtake o te Riri hei tautoko i ngā whānau, hapū, iwi, hapori hoki hei maumahara i aua pakanga. Hei tō Paraone Gloyne o Ngāti Raukawa “i tohu ai taua rā i runga i te whanaungatanga o te Pūtake o te Riri, ki te whakaputanga o Nui Tireni, nō reira āe kei reira ētahi āwanatanga kia kite te rā engari ka tū tonu te rā”. Ko te tikanga kia tū te rā whakamahara ki roto o Taranaki a tērā tau.