Te Rangi Āniwaniwa - Pūrongo Motuhake

Hei tā Haami Piripi, "Ahakoa te pakanga o mua, e tiro ana tātou ki mua, nā reira, me he mea ka anga whakamua tātou me mauria pai ēna tuahuatanga kei waenganui i a tātou, kia rongohia, kia mārama hoki, kia whakatūria he wāhi pai mō ngā whakatupuranga hou."

I mua i te mutunga o te wahanga tuarua o te Kura, ka whakanuia e te tini ngerongero te huringa rua tekau ma tahi tau o Te Kura Kaupapa Māori o Te Rangi Aniwaniwa i Te Hiku o Te Ika.

Hei tā Waha Tauhara Akonga o Mua, "E hia kē nei ngā tauira kua puta i tēnei kura, ki te kimi huarahi, me te kimi oranga mō ō rātou whānau me rātou anō hoki, ka tika me hoki mai mātou ki te whakanui i te huritau o tō tātou kura, nā te mea ko tēnei te whare i whakatenatena, i poipoi i a mātou kia kimi i aua oranga"

I te tīmatatanga, ka tupu mai tēnei kura i te Tarahiti o Te Aupouri, Te Rarawa, Ngāti Kahu.  Nā te Tarahiti tonu, i whakatū i Te Aniwaniwa Kōkiri, he kaupapa whakapakari i ngā uri o te rohe.

Ko ngā mātua o Te Kōkiri anō ērā i whakaatū i te Kōhanga Reo o Aniwaniwa, ēngari arā tonu te wawata, kia kokiri tonu ngā mahi ako o ngā tamariki i roto i te reo Māori.  

A, he roa tonu te wā kia whai mana motuhake ai te Kura hei Kura Kaupapa Māori.  

Engari kīhai te waka i totohu. Nā te kaha whai o Hira Harawira i tāna tohu pae rua ki te Whare Wānanga o Tāmaki, ka ea te wawata, kia whakatū i te Wharekura o Te Rangi Aniwaniwa.

Tokotoru ngā ākonga tuatahi, ko te hōro o te Kura te rūma whakaruruhau. Nā wai rā, i ngā tau rua mano, ka tae te Kura o Te Rangi Aniwaniwa, ki te tiketiketanga o ngā Kura o Motu.   

Ahakoa he nui te nama mō te whakatū i te puna wai kaukau tuatahi ki rō whare i Te Hiku o Te Ika me te kaha whakahē hoki a Te Tāhūhū Mātauranga, ka ea tonu tērā wawata i te tau ruamano mā toru.

Kātahi rā ka ngana tonu te whānau ki te whakatū i ētahi kōti poitūkohu, hōro nui hoki ki rō Whare i Te Rangi Aniwaniwa.  Ka ea taua wawata, i ngā tau tata nei.

Mō Ruruhi Heihei, he kahurangi o mua o te Kura hoki, i tēnei tau ka tīmata ki te whakaako i ngā tau tuawhā me ngā tau tuarima ko te pai o te whakanui i te rua tekau mā tahi tau o te Kura, ko te hoki mai ki te Kainga, ki te ngaki i te kāri, me te whakaako ki te taha o tōna whāea, he mahita kura hoki ki Te Rangi Aniwaniwa.

"I te whakatōputanga o ngā karangatanga maha o Te Rangi Aniwaniwa mō te huringatau 21o te Kura, ara tonu te pātai, he aha ke ngā wawata mō te kura, i te Kura e anga whakamua ana."