Ko te tuatahi o ngā waka topa NH90 e toru me tana tira o Te Tauaarangi o Aotearoa kua rere atu ki Nowra, i New South Wales ki te tautoko i ngā mahi a Te Ope Kātua o Ahitereiria ki te patu i ngā ahi o Ahitereiria.
Nōnanahi nei wehe atu ai te tira i Ohākea mā runga waka C-17 o Te Tauaarangi o Ahitereiria.
E rua anō nga waka RNZAF NH90 ka tukuna ki Ahitereiria hei ngā rā e rua e haere ake nei.
E ai ki Te Tauaarangi o Aotearoa, ka taea e ngā waka topa NH90 te tautoko ngā mahi i runga i te whenua, te āwhina i te wā o te maiki nui, te kimi me te whakarauora, te aukati i te mahi huna taimiri, i te mahi whakatumatuma anō hoki.
He ope tauā pūkaha me tētahi tira ngārahu o Ngāti Tūmataūenga hoki ka tukua ki Ahitereiria mā runga waka RNZAF C-130 Hercules hei awhi i ngā mahi a Te Ope Kātua o Ahitereiria.
E 22 hoki te nui o tētahi tira mahi patu ahi ka wehe atu i Aotearoa ki New South Wales hei te Rāapa, e 20 o rātou, he kaipatu ahi, kotahi te kaiārahi, kotahi hoki te āpiha takawaenga. Ka 11 ngā rā rātou ki reira, ka hoki mai hei te 20 o Kohitātea.
