Te tono a Te Matatini kia whakawhānui ake ngā pūtea tautoko a te Kāwanatanga

Taroi Black

Kei koni atu i te rua rau mano ngā tāngata i tae ā-tinana atu, i mātaki rānei i ngā whakapāhotanga o Te Matatini i tēnei tau.  

Ko te pātai ināianei, ka tutuki pai rānei ngā tūmanako o Te Matatini kia nui ake ngā pūtea tautoko a te Kāwanatanga mō te taiopenga nui nei ka tū ia rua tau.

E ai ki a Herewini Parata, he hiahia nō rātou kia rahi ake te pūtea ā-Kāwanatanga kia whakawhiwhia ki Te Matatini.

Ia tau ka whakawhiwhia te kotahi ira rua miriona tāra ($1.2mil) hei whakatū i Te Matatini e Te Manatū Tāonga.

Heoi anō, he tata ki te whā ira whā miriona tāra ($4.4mil) ka hōatu ki te Royal New Zealand Ballet, he tekau mā toru ira whā miriona tāra hoki ki te New Zealand Symphony Orchestra. 

Rima tekau mano ngā kaimātakitaki ka tāe atu ki Te Mataini, ā, he kotahi rau rima tekau mano ano ka hono mai ma roto i ngā whakapāhotanga ā-ipurangi, reo irirangi me te pouaka whakaata.  Hei tā Maggie Barry, he uaua te kī kei ā wai te mana mō te pūtea. 

Mai i Ōtautahi kua tukuna te mauri o te kaupapa ki Ngāti Kahungunu mō te hui hei te tau rua mano tekau mā whitu, ā, ki reira ka kite ai pea mehemea ka ea ngā manako a Te Matatini.