Te Ture Whenua Māori bill revamp to improve governance

Ko tētahi tikanga a te pire whakahōu i te ture whenua Māori he whakatikatika i te mana whakahaere a ngā rōpū tiaki whenua Māori. Ēngari e ono ngā uepū Māori kua tiriwāhia i ēnei here, kia mau tonu ai i ō rātau ake tikanga whakahaere.

Mā te ture whenua Māori hōu e kite atu ai he huarahi hōu e pai ake ai tā te Māori whakamahi i ōna whenua.

E ai ki ngā whakahōutanga, Mēnā kāre he rōpū whakahaere i ētahi whenua, e taea ai e ngā kaipupuri whenua ki te whakatū rangatōpū, whakaāetanga rānei e pā ana ki ngā mahi a tāua rōpū.

Ēngari kua tiriwāhia ake ngā uepū Māori e ono i te wahanga ō te pire e hāngai ana ki te mana whakahaere ō ngā rōpū whenua Māori.

Arā, ko Te Puna-Tōpu-o-Hokianga tērā, he rōpū tiaki whenua ngahere i Te Taitokerau. Ko te rōpū whakahaere i ngā ana ō Waitomo, arā, Ruapuha-Uekaha Hapū Trust.

Ko te pāmu ō Te Ngae, he whenua i whakahokia ki a Ngāti Rangiteaorere i Rotorua. Ko te Rōpū Tiaki ō Tuaropaki, i te Puku ō te Ika; nō rātau ngā whare hiko ngāwhā i Mōkai.

Ko ngā whenua rāhui ō te Pā ō Ratana. Me ngā moutere Tītī e karapoti ana i Rakiura.

E noho motuhake ana ēnei uepū e ono i te wahanga e pā ana ki te mana whakahaere ō ngā roopu whenua Māori, inā he mana ō ētahi i raro i ētahi atu ture, pēnei i ngā whakataunga kereme tiriti.

He mea ahurei te āhuatanga ō ētahi atu whenua, pēnei i ngā whenua rāhui ō Ratana. Nā reira ka noho pūmau ngā uepū ki ō rātau ake tikanga whakahaere.

Ēngari e hāngai tonu ētahi atu tikanga o te ture whenua Māori hōu ki a rātau. Hei tēnei tau whakamanahia ai te pire.