Te Whakaheke pākawa ota whakapākeka te mahi ki Parekarangi

Kei te mahi tahi tētahi o ngā pāmu Māori ki Rotorua i te taha o Agresearch hei whakaheke i ngā pākawa ota whakapākeka. Nō te tau 2016 timata ai te pāmu Māori o Parekarangi te mahi tahi me rātou. Ko te pūtaiao me te rangahau kei te hapai i ngā mahi ki runga i tēnei pāmu Māori Ki tā James Warbrick, Heamana o Parekarangi “ko te whenua te mea nui, ngā ture hōu e pā ana ki te wai ki o mātou roto, kei te kimi mātou i te huarahi hei whakataurite kia puta ai ngā hua”.

Kua kite ake a Parekarangi i ētahi atu huarahi hei whakamahi i te whenua na runga i o rātou mahi i te taha o Agresearch ko to rātou tino aro kia whakaheke i ngā pākawa ota whakapākeka, ā, ko ngā kau te tino pūtake o tēnei mahi. Hei tā Chris Koroheke, Kaiurungi Ahuwhenua Māori “kei te tiro a Agresearch ki ngā kai kei te whāngai ki ngā kau, he aha ngā tūahuatanga kei roto mai reira ka mārama mātou na te aha e puta ai ngā pākawa ota whakapākeka”.

Neke atu i te kotahi mano ngā kau kei runga i to rātou whenua. Ki tā James Warbrick kei te kaha rātou ki te tiaki i te whenua me te wai ka mutu mehemea kei ngā mahi pūtaiao te whakautu, he māmā mo rātou ki te whai i tētahi huarahi rerekē. Ki tā Warnrick anō, “mo mātou o Parekarangi, kei te mārama mātou nō reira kua noho tēnei mahi hei tauira, heoi kei te tūwhera o mātou kūaha ki ētahi atu kaipāmu puta noa i a Rotorua”. Tekau katoa ngā pāmu e mahi ana me Agresearch hei whakaheke i ngā pākawa ota whakapākeka.