Te whakapae a tētahi kuia pouaru mō te mahi tinihanga a te Ūpoko Rawa ō-mua o Te Rōpū Taurima

Kuini Matene

E tiro ana te pouaru a Kuini Matene ki ngā whakaahua o te motokā rangatira nāna i tuku ki a Saul Roberts i tōna whakaaronui kia kaua ai te kuia nei e taimaha ki te utu i ngā tinimano tāra e kō tana, hei whakatika i taua motokā.

Hei tā Kuini Matene o Ngāpuhi, “Ka noho tērā ka tatū ka tāria ka mahi ai tāna mahi ka whiwhi au te car i waho nei, haina i ngā pepa, nā, nā, nā.”

“Ka noho ana au ka whakaaro ana au, horekau i tino tatū taku whatumanawa, engari me pēhea hoki i tēnei wā.  Ko taku whakaaro, he took advantage of me. I had just lost my husband".

He minita tahi rāua nō te Hāhi Mihinare. E hia kē ngā tau i mahi ai a Kuini me tōna hoa rangatira a Rui Kawhe Matene mā Te Rōpū Taurima o Manukau. 

Nō ngā rā nei kātahi ka puta ngā whakapae ki runga i te hōtaka o Native Affairs mō ngā tini mano tāra kua tinihangahia e Saul Roberts mai i taua rōpū.

Ko tā Kuini, “Nō te rongonga o tēnei o ngā mahi i roto i te Rōpū Taurima ka pā mai tērā takariri ngaukino nei i roto i a au.  I mahia tērā mahi ki ngā mokopuna me ahau.”

Kāhore ōnā whakamau engari ko te hiahia o tēnei kuia kia whakahokia mai tōna motokā rangatira kātahi. Ka rua, kia whakatikaina ngā āhuatanga kino katoa kua pā ki Te Rōpū Taurima i whakatūria ai e ngā mātua i runga i te whakaaro rangatira hei hāpai i te hauora o ngā hauā me ngā wairangi.

Aianei tātou kite ai mehemea ka mahia te mea tika.