Te whakataetae Vaka Eiva 500m - Te Rā Tuatoru

Rahia Timutimu

Hāunga ngā rēhi roa, i te rā nei i kitea ngā rēhi poto, he rima rau mita te tawhiti.

I whai wāhi ai ngā pakeke ki ngā pakanga o te rā, i whakamātauria ai hoki e Aotearoa ōna pai, ōna kino rānei ki ngā kapa nō whenua kē, nā rā ka noho koinei ngā kapa ka pakanga ki ngā whakataetae waka ama o te ao a tērā tau ki Ahitereiria.

Aua atu i te 250 kaihoe i whakakao ki te whanga o Muri i te rangi nei, he rēhi 500m hoki te take, ka mutu, koinei anake ngā rēhi poto katoa o tēnei taiopenga nui.

Katoa katoa ngā momo pakeketanga i kitea i te rangi nei, mai i te reanga ika ā-whiro, atu ki ngā pākeke me ngā kaumātua, katoa rātou i tohe ki a Tāwhirimātea i roto i ngā huringa 250m e tutuki ai te 500m.

Tērā ngā ika ā-whiro wāhine i waere tuatahi i te ara o tātāwhāinga, ērā rā o Te Tuamoana nō Porirua, Aotearoa.  Nā te kaha pupuhi o te hau i uaua ai ngā hurihanga 250m mā ngā kapa wāhine nei, engari anō mā ngā wāhine o Te Whanganui-a-Tara, i te autaia o te hurihanga, i toa i a rātou te whiringa whānui tuatahi o te rā. 

Mai i ngā wāhine ki ngā reanga tāne, kekē ana te haere a te kapa o Ruamata, tētahi o ngā kapa ika ā-Whiro tokitoki katoa o Aotearoa, i tae mai ai ki te whakamātau i ō rātou pai, kino rānei e rite ai rātou mō ngā whakataetae waka ama ā-ao ka tū ā tērā tau.

Hei tā Wiri Hohepa, “He rawe, ko matou anake te kapa tāne o Aotearoa, nō reira he rawe ki te kite i ngā tāngata nō te kāinga, nō Porirua, nō Tāmaki Makaurau, Te Waipounamu hoki, nō reira he whakahoahoa ki Rarotonga.”

Hohoro ana ngā hoe a Ruamatā i te tīmatanga, tāhi rā ka rae tukituki atu ki te kapa o Ngākau Toa i te hurihanga 250, ā, nā wai i tika, i kounga, kātahi ka kounga kē atu, mīere kau ana i a rātou te toenga i tā rātou whiringa whānui tuatahi mā ngā tāne.

Hei tā Hohepa, “Āe, he rawe tērā rēhi, he rēhi poto, engari he tino uaua kei runga noa atu te taumata, pupuhi ana te hau i te haerenga atu engari i te hokinga mai i tere te haere, tino koi tā mātou kaiurungi, nō reira taku titiro i pai tō mātou huri."