Tedesco, te tuahangata riki o te wā

Ko te haika o te kapa Roosters, ko James Tedesco tērā kua whakaingoatia hei toa o te tohu Dally M mō te tau nei. 

I whakahinga ia i te kāpene o te tira Storm, i a Cameron Smith mā ngā piro e toru, ka mutu, ko te haika o ngā Warriors, ko Roger Tuivasa-Sheck tētahi o ngā tautapanga.

I whakawhiwhia hoki ki a Tedesco te tohu haika toa o te tau i te kapa Dally M.

Ka haere tahi ēnei tohu ki ērā i whakawhiwhia kētia ki a ia i tēnei tau, arā, ko te mētara Wally Lewis me te mētara Brad Fittler mō te nanakia o tana tākaro i te terenga State of Origin.