Ko tā Harepaora Ngahue e tūmanako nei kia hoko pāmu ia i roto i te tekau tau e haere ake nei, kei roto ia i ngā whiringa whakamutunga mo te tohu kaipāmu Māori ahu whenua mo tēnei tau. Koia te kaiwhakahaere o tētahi pāmu ki Waiohau, ā, kei te mahi ia i tēnei mahi hei oranga mo tōna whānau. Ki tā Ngahue “Aisha taku hoa me a māua kōtiro ātaahua ko rātou te take konei mātou i tēnei rā, ā, ko rātou e ārahi ana i a mātou ki roto i ngā rā anamata”.
Ko Harepaora te kaiwhakahaere o tētahi pāmu i Waiohau me tana tumanako ka whakatinana ia i ētahi kaupapa hou mo ngā mahi pāmu. “He nui tonu ngā pāmu Māori, ā, me tiaki mātou i ngā ara o te wai, mā te whakatū taiepa kia kore e uru ngā paru ki roto i te whenua”.
I uru a Harepaora ki roto i ngā mahi pāmu i muri i tētahi akoranga ono wiki te roa i te tau tekau mā toru. Ko ōna wawata i tērā wā kia noho ia hei kaiwhakahaere ki runga i tētahi pāmu, i te tau rua mano tekau ma ono i whakatinanahia tōna wawata, ā, i uru ia ki roto i te whiringa whakamutunga mo te kaipāmu Māori o te tau, ahakoa kāre ia i eke, kua uru anō ia ki roto i ngā tauwhainga mo tēnei tau, ā, hei tāna he nui ngā whēako kei a ia.
“Ko taku tino wawata mai tēnei kaupapa kia whakaawe i te Māori ki roto i ngā mahi pāmu nei, na te mea he nui tonu ngā pāmu Māori kei konei, engari ko ētahi kē kei te whakahaere”. Ko Harepaora tētahi o ngā ingoa ki ngā whiringa whakamutunga ki te wāhanga kaipāmu rangatahi o te tau. Ka tū te pō tuku taonga hei tēnei Rāmere ki Ōtautahi.
