Tokorua ngā tūroro mate kowheori hōu i Ōtautahi

Kei te whakatewhatewha Te Manatū Hauora i ngā tūroro mate kowheori hōu i kitea i Ōtautahi inapō.

Ko ngā āpiha hauora i whakamōhiotia ki ngā tūroro hōu e rua nō te whare kotahi, ko tētahi o rāua nō ngā rangi tata nei ka hoki atu i Tāmaki Makaurau ki Ōtautahi.

Ko te rōpū hauora tūmatanui o te rohe kei te emi whakamārama atu i ngā tūroro e rua kia mōhiotia ai ō rāua kiritata, tae atu ki ngā huihuinga, wāhi anō hoki kua torona e rāua.

Nā te Minita Take Mate Kowheori, nā Chris Hipkins te kōrero ki te hōtaka Parakuihi o Te Reo Tātaki i tēnei ata, ko te tūroro i haere ki Tāmaki Makaurau kua kotahi wiki nei i Ōtautahi, ā, kua māuiui ia i te nuinga o taua wā.

Hei tāna anō, kaare anō te tokorua rā kia werohia ki te kano ārai mate, ā, kīhae rāua i kaha ki te whakamahi i te taupānga Whakataki Toronga mō te mate kowheori.

I tēnei wa, ko tētahi atu whare kei te āta tirohia hei wāhi whai pānga tata rawa ki ngā tūroro nei.

Ko ētahi atu whakamārama ka puta i Te Manatū hei te kotahi karaka i tēnei ahiahi.