Tokotoru ngā tūroro COVID-19 hōu, kāore he matenga anō

breaking Jessica Tyson

Ko te tatauranga o ngā tūroro COVID-19 i Aotearoa i piki ake inapō, e rua o rātou kua pākia, ko tētahi atu e matapaetia ana kua pākia.

Hei tā te Toihau Whakahaere i te Rāngai Hauora, hei tā  Dr Ashley Bloomfield, ko ngā tūroro hōu e rua e whai hononga ana ki te kāhui o Marist i Tāmaki, ki te Whare Manaaki Kaumātua o Gladys Mary hoki i Te Matau-a- Māui.

“The probable case in South Canterbury is under investigation," hei tāna.

Ko te katoa o te hunga kua pākia i Aotearoa, kei te 1,472 te nui, ā kāore he matenga hōu hei kōrero.

1,214 katoa kua whakamāui ake, e 34 te kakenga ake o inanahi. 

Hei tā Dr Bloomfield, ko te hunga kua whakamāui ake, ko rātou ērā kua kore he pānga o te mate i ngā haora 48, i ngā rangi tuangahuru rānei nō te kitea tuatahitia o ngā tohu mate. 

“Now 82 per cent of our cases are classified recovered.”

Tokoiwa kei rō hohipera mō te mate Covid-19, ko tētahi o aua tāngata kei te wāhanga whāomoomo i te hohipera o Middlemore i Tāmaki Makaurau, ā 16 tonu ngā kāhui tūroro huri i te motu. 

E ai ki Te Manatū Hauora, e iwa ōrau o ngā tūroro katoa kua pākia, he Māori, ā e rima ōrau, he uri Pasifika.

Inanahi, e 2,146 ngā whakamātautau i mahia, ā ko te tapeketanga o ngā whakamātautau katoa kua mahia puta i te motu, kua eke ki te 126,066.

Ko ngā whakamāramatanga mō ngā tūroro katoa ka kitea i te whārangi ipurangi o Te Manatū Hauora.