Nā te Pirimia, nā Jacinda Ardern rāua tahi ko te Kahika o Whakatāne, ko Judy Turner ngā whakamārama hōu i te ata nei mō te aituā ki Whakaari.
Nā Pirimia Ardern te whakatau, e rua ngā hūnga i te moutere inanahi.
E rua ngā rōpū i runga i te moutere i tērā wā, e 47 ngā tāngata.
- 31 kei rō hohipera tonu
- 8 e ngaro tonu ana
- 3 kua tukuna i te hohipera
Ko ngā tari whakaora weranga huri i te motu e whakamahia ana ki te whakaora tūroro.
Kaare anō kia kitea he tohu o te ora i te moutere.
He tūruhi nō Aotearoa, nō tāwāhi hoki kua pākia, e 37 ngā pāhīhī, kotahi hoki te kaimahi o te kaipuke tipi haere Ovation of the Seas.
Kei te taumata whakatūpato tuatoru a Whakaari i tēnei wā, ā e tāria ana ngā tohutohu mō te āhua o te moutere.
Ko ngā waka topa whakarauora, ko te Kārearea a ngā Pirihimana, ko te waka rererangi NZDF hoki kua rere huri noa i te moutere nō te hūnga inanahi, ā i te ata nei he rerenga hūhunu anō i tukua. Ko ngā whānau o rātou kua pākia kei te pū o ngā whakaaro o ngā pirihimana i tēnei wā.
He tautoko e whakaritea ana mā ngā whānau o te hunga kua pākia me te tuku whakamārama ki a rātou inā puta ai.
Ko te hunga hiahia tuku whakamārama e pā ana ki tētahi i toro atu pea ki Whakaari i te wā o te hūnga, me waea atu ki ngā Pirihimana, kei 105.
Ko te hunga kei tāwāhi, me waea atu ki +64 9105 105, whakamahia rānei te whārangi i te pae tukutuku a ngā Pirihimana i te ipurangi.
Nā te īnoi hoki a Ngā Pirihimana o Aotearoa, kua whakatūria e New Zealand Red Cross, he paetukutuku Family Links mā te hunga ka hiahia rēhita, kimi whakamārama rānei mō tētahi kua pākia.
He kōrero anō ka whai ake nei.
