Tōrangapū: Manahua te kupu, manarū te kōrero, manapou te reo Māori

Ko te rere o te reo Māori e kaha rongo nei i ngā aratuku o Whakata Māori i tēnei pō. Ko te kaupapa ko te tautohe tuatahi i waenga i ngā pāti tōrangapū me ngā kaikōrero reo Māori e whai ana i ngā pōti o te motu.

Ko Shane Jones me ana pukenga whakaharahara e tū ana mo Aotearoa Tuatahi, ko Sonny Wicox e tauhou ana ki te ao tōrangapū engari e whakaū ana i te pāti Matakite Aotearoa, ko Rawiri Waititi me tōna pōtae kaupoai e tū ana mo te pāti Māori, ko Teanau Tuiono mō te ropū Kākāriki me tōna aroha ki te taiao oti atu ki a  Peeni Henare mō te ropū Reipa.

Ko Ruth Smith rāua ko Te Hira Paenga i noho ki te pae kōrero wetewete ai i ngā kōrero a ngā kaitōrangapū o te pō.

TE REO

Hei tā Shane Jones, “kaua e waiho mā te ture anake e whakarauora te reo.” I whakahē te ropū Aotearoa Tuatahi kia whakaturehia Te Reo Māori ki ngā kura. “Ko te tēpū kai, ko te whānau ērā ka ora ai te reo.”

Kāore a Rāwiri Waititi i te ware ake ki te utu o te panoni ingoa puta noa i te motu ki Te Reo Māori. Hei tāna me tīni ko te tāmitanga o Te Reo Māori.

E ai kia Sonny Wilcox o te Pāti Matakite Aotearoa, “ko te katoa o ngā kaitono he Māori.” E tautoko ana te Paati Matakite Aotearoa i ngā tono kia whakaturehia te reo ki ngā kura.

PĀPĀHO MĀORI

Hei tā Peeni Henare, mā te whakarite mahere tono pūtea hou ka mutu, me rahi ake ka mārama te huarahi tautoko.

Kāore ā Shane Jones i te tautoko kia whakakotahihia ngā whare pāpāho Māori, “me waiho ngā reo irirangi ki ngā hapori.”

IHUMATAO

E ai ki a Peeni Henare, “kei te whakarite a Reipa kia whakahokia te whenua.” Hei tā Rāwiri Waititi mō Paati Māori, a Sonny Wilcox mō te ropū Matakite Aotearoa, tae noa kia Te Anau Tuiono mō te ropū Kākāriki “me whakahoki.” Hei tā Shane Jones, “kāo, he take iti.”

Hei tā te pae wetewete kōrero a Te Hira Paenga, e kaha kōrero nei ngā pāti mo te mana motuhake me te tiriti, engari he pēhea te āhua o te mana motuhake ki ia rōpū?”

I tautoko hoki a Ruth Smith i ngā kōrero a Paenga, hei ta Ruth māmā te kōrero, kei hea te whakatinanatanga.”

HANGA WHARE

Hei tā Sonny Wilcox, “ki te whakahokia te whenua ki te iwi Māori, koirā te tūāpapa hei hanga i ngā whare. Ka whakatū e Matakite Aotearoa he whare pūtea, hei kohi pūtea na te kāwanatanga, ki te hanga whare. Heoi kāore ia i te mōhio he aha te nui o taua pūtea.”

Hei tā Teanau Tuiono, “he neke atu i te piriona tāra e whakapau ana ki te hanga whare, heoi e hiahia ana te pāti Kākāriki kia whakaraurua, kia whakakore ai te rārangi tarea.”

Hei tā Shane Jones, “he māmā noa iho te kōrero pūtea, engari ko te ture kua toka kē. E rua ngā huarahi titiro, kaua e waiho te whenua kia hokaina e te tangata. Ka rua, kaua e waiho ko ngā kaunihera hei whakahau atu i ngā whenua Māori.”

E whakaae ana a Rawiri Waititi ki tā Shane Jones, “me tiro anō ngā ture, kia pai ai te hanga whare ki runga whenua Māori. Heoi, kāore e whakaae kia noho te mana o te whenua ki te karauna, hāunga te mana o te whare.”

Ko tā Peeni Henare, “me mahi tahi te karauna ki ngā iwi, engari kaua e riro te whenua Māori ki ngā take ā te kāwanatanga.”

Mo te roanga ake o ngā kōrero tēnā hono atu ki te te kiriata