Waikato triumphant in Māori league finals

Ko te kapa o Waikato ngā toa whakaihuwaka i te tohu whakamahara i a Lummy Newton, mō te wāhanga Waka i te whakataetae rīki Māori ā-motu mō tēnei tau i tū ki Wainuiomata.

Nā Waikato a Ngāi Tūhoe i turaki i te whiringa toa, tekau mā rua ki te whā te kāute whakamutunga.

Pēnā ko ngā haka te tohu nui o te whiringa toa o te wāhanga Waka o te whakataetae rīki Māori ā-motu i tēnei tau - koia rā te kakari nui whakaharahara te haere ake nei.

Āe mārika ko ngā kapa rīki o Tūhoe me Waikato e hō atu nei i te whiringa toa o te wāhanga waka i tēnei tau. He tākaro kī pai ana i te taiea rīki Māori hei taupoki ake i tēnei whakataetae - e toru rā te roa.

Ko te manawa piharau o Tūhoe i kitea i te haurua tuatahi o te tākaro. Tē ngaro i a rātou te iho tākaro i tau atu ai te kapa ki tēnei o ngā whiringa toa.

Engari he pērā hoki rā a Waikato. Ki ngā pikonga katoa o te tākaro, tū taniwha mai ai ahakoa te aha.

Koia rā hoki kāore pea he wāhi aroha i ngaro noa atu. Ko ngā kapa e rua e whakaatu nei i ā rātou momo i te rārangi ārai. He piro a Waikato hoki tērā i whakakorea e ngā kaiwawao.

Ā, kāore i te tino roa mā Waikato hei whakatika i tērā korenga. He whakawhitinga rārangi piro rua tekau mīta te tawhiti.

He piro tōmuri tēnā ki ngā tamariki o te kohu, kāore i mātua i tērā kia wikitōria i a rātou te tākaro.

Ki whiringa toa kē anō, ko Ngāti Umutahi ngā toa o te wāhanga Wāhine mō tēnei tau.

Ā, hei tērā tau tū anō ai te whakataetae rīki Māori ā-motu ki roto o Te Arawa waka, ki roto tonu o Rotorua.