"Whakakorea ngā mahi tāpoi" - "Whakarongo ki ngā tohu"
E ai ki a Pouroto Ngaropo nō Ngāti Awa, me mutu te mahi tūruhi ki Whakaari. Hei tāna, i reira ngā tohu, ā e tika ana me wehi ki a ia.
Rāhui -
I mua i te aranga ake o te rā i te ata nei, he karakia tawhito i tākina rā e Ngaropo hei whakarāhui te moutere o Whakaari me tōna takiwā i tēnei wā.
Ko te tikanga ia, kia kaua rā e hao kai i te moana, kia hikina rā anō te rāhui.
Ko ngā kaimahi hoki o White Island Tours i taki huihui atu ki tō rātou tari i tēnei ata ki te karakia.
E ai ki ngā whakamārama ki a mātou o Te Ao, i reira hoki te whānau o tētahi tangata e whakapaetia ana, e mau tonu ana ki Whakaari, engari kare anō kia whakaingoahia.
Ko te kōrero anō, kaare hoki ngā waka hī ika mō te hoko i puta ki moana i te rā nei.
Mataatua Mānuka Tūtahi -
Neke atu i te kotahi rau tāngata i taki huihui atu ki Te Mānuka Tūtahi Marae, i Whakatāne ki te karakia i te ata nei.
Taunga Rererangi o Whakatāne -
Nā Air Chathams hoki te kōrero, i whakakorea te rerenga 3C821 atu i Whakatāne ki Tāmaki i te ata nei, nā te nui tonu o ngā mahi a ngā ratonga ohotata ki te taunga rererangi o Whakatāne.
E ai ki tētahi kainoho i kōrero mai ki Te Ao i te ata nei, e tino pūmau ana te āhua o ngā kaitūtei ki te taunga rererangi.
Hei tāna, i aukatia te kuhunga atu, ā he kotahi haora te takaroa o te putanga o ngā pāhīhī whai muri i te hekenga i te waka rererangi.
He kōrero anō ka whai ake nei.
