Pāti Māori: ”Kāore mātau mō te hono tahi ki a Nāhinara....i tēnei wā”

By Heta Gardiner

Ae rānei kei te hoki te pātiki ki tōna puehu? Koirā te kōrero e karore haere ana, whaimuri i te whakaputanga pāpāhō i ngā rā whakatā, e kore te Pāti Māori mō te huri tuarā pokanoa ki te hono atu ki a Nāhinara me tana kaiārahi hōu a Christopher Luxon.

Whai muri mai i ngā whakaputanga, i wawe tā te Pāti Māori tinei i taua ahi, ki runga i ngā pae pāpori. Ēngari i te wero atu o Te Ao Mārama, i reira tonu te tatau e tūwhera, ririki ana. Ko te whakahoki ki te pātai, mena e pono ana ngā whakaputanga pāpāhō, ko tā Rawiri Waititi, “Kāore i te tika, kao!”

Ēngari i te wero tonu o Te Ao Mārama, mena kua kati mārika te tatau, ahakoa ngā mahi ngā kōrero rānei a Nāhinara, ko tā Rawiri “E kore rawa i tēnei wā, e kore rawa. Kia tīnihia ngā whakaaro, kia tīnihia hoki te ngākau ki ngā āhuatanga Māori, ēngari i tēnei wā, e kore rawa.”

I te ui atu i te pātai, mena ka tīni ngā whakaaro o Nāhinara, ae rānei ka tūwhera te tatau ki a rātau, i noho taiapa te Mema o Te Waiariki. “Me tatari ake kia tīnihia ngā whakaro i te tuatahi. Kāore au mō te kōrero moata i taua kōrero rā.”

I noho tahi a Nāhinara me te Pāti Māori hei hoa haere mō ngā tau e iwa, ā i mimiti haere te tautoko o te Pāti Māori ia wāhanga i roto i taua iwa tau, tae noa ki tana turakitanga i te tau 2017.

I te kōwhiringa pōti kātahi anō ka hori, i kītaurangi atu te Pāti Māori, e korekore te kurī e hoki ki te kai i tana ruaki.