-Nā Waimanea Nuri, he pia o Te Rito
Nō ngā rangi whakatūwhera anō ai te wharenui o Tanenuiārangi, i Te Mapou marae i Maungapohatu.
Mā tēnei kaupapa nui, whakahirahira i huaki ai ngā tatau kia hoki anō ai ngā tāonga a Rua Kenana ki tōna ake ūkaipō.
E ai kia Erana Manihera, o Tamakaimoana kua tino roa te wā e noho mokemoke ana a Maungapohatu i te iwi me ngā hapū o te kāinga.
“Kua karanga a Tanenuiārangi, hoki mai, whāngaihia ngā tamariki mokopuna ki ngā mahi a tātou a te Māori, a te wairua tapu.”
I hoki atu ngā uri o Tamakaimoana kia pōhiritia anō ai ngā taonga i whānakohia e 106 tau ki muri.
E ai kia Erana Manihera, koira te wā i murua te tangata, i murua ngā tāonga, me ngā tupuranga o ngā reanga o aua wā.
Hei tā Nika Rua, uri o Tamakaimoana kua ahei anō te hapū kia anga whakamua te titiro..
“No te ata nei ka whakaohongia tō mātou tipuna whare kia rongo ai ia i te aroha, kia rongohia i te mahana a ōna uri kua whakaeke nei ki runga ki a ia i tēnei rā.”
Kua roa te wā ngā whānau e tāria ana ki tēnei rangi, ā, nā te rōpū whakapaipai, whakatikatika i te whare o te haukāinga, tēnei rangi i whakatū.
E ai kia Karaitiana Rurehe, uri o Tamakaimoana, kaiwhakairo hoki o te whare, nā te PGF, ngā tāngata i āwhina ki te whakatū hoki i te kaupapa o te whare.
“Ko ahau, ko tētahi atu ko Manimani, ko John Rua hoki ngā tāngata i whakairo i ngā pou o te whare.
“Ahakoa e koa ana te ngākau, kua hoki mai ngā uri ki tēnei kaupapa, kia maumahara hoki tātou ko ngā mātua tīpuna i waihanga, i whakairo i tēnei whare i mua rā, ko rātou ngā hunga whakairo tūturu, ko mātou ngā hunga whakapaipai noa iho”.
E ai kia Erana Manihera, pēnā au i te waiata i te waiata a taku tungane, ko tana mokemoke mo te kāinga.
“E mahue ana a Maungapohatu i te iwi, i a Tamakaimoana, whakahokia mai a Tamakaimoana, ngā tamariki o Iharaira, i roto i te karaipiture - ko ahau tō atua ko koutou Iharaira waku tamariki, he karaipiture tērā, ana takawaenga haere i te marae.”
